የመንፈሳዊ አድግተ መለያዎቸ ምንምን ናችው?

Answer 1

የመንፈሳዊ እድገት መለኪያ ነው ብዬ የምለው አንድና አንድ ብቻ ነው። ይኸውም አንተው ራስህ ለዚህ ጥያቄ የምትሰጠው መልስ ነው።
ምን ያህል ዕለት ዕለት ጌታ ኢየሱስን እየመሰልክ ነው?
እንደኔ አመለካከት ጌታ ኢየሱስን እየመሰልን በኖርን ቁጥር ሌሎች ነገሮች በሙሉ ስፍራቸውንና መልሳቸውን ያገኛሉ። እኛ ሊያሳስበን የሚያስፈልገን ጉዳይ ቢኖር ክርስቶስ ኢየሱስን የመምሰላችን ጉዳይ ነው። ሌሎች ሙከራዎች በሙሉ ጌታን ከመምሰላችን ስር የሚጠቃለሉ ናቸው ብዬ አስባለሁ።
በተጨማሪ ገላትያ 5 ስንመለከት ነፍሳችን የምትመገበው ከሥጋ የሆነ ወይስ ከመንፈስ የሆነ? ውሎአችንን የምንውልብት አዋዋል ትልቅ መመዘኛም ሊሆንን ይችላል። በሕይወታችን አሸናፊው ማን መሆኑን (ሥጋ ወይስ መንፈስ) ካወቅን ዕድገታችንም የትኛውን እንደሚመስል ማወቁ ያን ያህል ከባድ አይሆንም።

ጌታ ይባርክህ!

ተሾመ መለስ
ኢየሩሳሌም፣ እስራኤል

Answer 2

እኔ እንደሚገባኝ የመንፈሳዊ ሕይወት መለኪያዎች በሕይወት የሚታዩ የመንፈስ ፍሬዎችና ክርስቶስን ማዕከላዊ ያደረገ ሕይወት ናቸው።

መንፈሳዊ ሕይወት፤ የምናከናውናቸው እቅስቃሴዎች (activity) ብቻ ሳይሆኑ ሕይወት ነውና የሕይወት ለውጥን የሚመለከት ነው።

ከሁሉም በፊት ክርስቶስን በትክክልና በሙላት መረዳትና እርሱን ማዕከላዊ ያደረገ እምነት ነው። ሃዋርያቱን በአዲስ ኪዳን ስንመለከት የሚናገሩትና የሚጽፉት ሁሉ ክርስቶስን ማዕከላዊ ያደረገና ክርስቶስ ክርስቶስ የሚል ነው። ምክር እንኳን ሰዎችን ሲመክሩ ክርስቶስን ጠርተው ነው። ስብከታቸውም ይሁን ምክራቸው ወይም ደብዳቤያቸው በሙሉ ክርስቶስን የሚያከብርና እርሱን ማዕከላዊ ያደረገ ነው፤ እንጂ እንዳው በደፈናው ስለ እግዚአብሔር ብቻ አልነበረም።

ክርስቶስን ማዕከላዊ ያደረገ ሕይወት ደግሞ የመንፈስን ፍሬ ያፈራል። የመንፈስ ፍሬ የሕይወት ባህርያት መገለጫ ነው። ከሁሉም ባሕርያት የሚበልጠው ደግሞ ፍቅር ነው። እግዚአብሔር ፍቅር ነውና።

Quote:

ወደ ገላትያ ሰዎች 5
22 የመንፈስ ፍሬ ግን ፍቅር፥ ደስታ፥ ሰላም፥ ትዕግሥት፥ ቸርነት፥ በጎነት፥ እምነት፥ የውሃት፥ ራስን መግዛት ነው።

1ኛ ወደ ቆሮንቶስ ሰዎች 13
13 እንዲህም ከሆነ፥ እምነት ተስፋ ፍቅር እነዚህ ሦስቱ ጸንተው ይኖራሉ፤ ከእነዚህም የሚበልጠው ፍቅር ነው።

Comments

ጌታ ይባርክህ ! ይህን የገልፀልህ በውስጥህ ያለው በጌታ ያለህ እምነትህ ነው።