ዋና ገጽ   የመጽሐፍ ቅዱስ ቃላት መፈለጊያ   ትምህርቶች   የመጽሐፍ ቅዱስ ጥናቶች   የነጻ መዝሙሮች   ነጻ ዳውንሎድ   ያግኙን 
website search (GO!)
 
ዋና ገጽ » ጥያቄና መልስ
Email this page to a friend Printer-friendly   Thursday, 23 March 2017
ዋና ገጽ
የመጽሐፍ ቅዱስ ቃላት መፈለጊያ
የመጽሐፍ ቅዱስ ማውጫ
የዕለቱ የመጽሐፍ ቅዱስ ምንባብ
አዮታ ሶፍትዌር
ትምህርቶች
የመጽሐፍ ቅዱስ ጥናቶች
የነጻ መዝሙሮች
ነጻ ዳውንሎድ
ያግኙን Contact us
ጥያቄ መጠያየቂያ Q&A
የእገዛ ገጽ Help

ሰለ ስላሴ አስተምሮት ብታብራራልን ?

ዩሀንስ
5 ዓመታት በፊት መንፈሳዊ ስም-አልባ የተጠየቀ
ስላሴ መጽሃፍ ቅዱስ የማያውቀው አስተምህሮ ነው። አንድም ቦታ ላይ "ስላሴ" የሚል ቃል ወይም "አብ ወልድ መንፈስ ቅዱስ አንድ አምላክ" የሚል አናገኝም። አንዱና ብቸኛው አምላክ፡ የጌታችን የኢየሱስ ክርስቶስ አምላክና አባት የሆነው፡ እግዚያብሄር አብ ነው። እግዚያብሄር አብ አይሞትም፤ ታይቶ አያውቅም፤ እኩያም የለውም። በራእይ 1፡1-2 ላይ ለጌታ ኢየሱስ ራእይ የሰጠው ይሄ ሁሉን የሚችለው አምላክ (አብ) ነው። በብሉይ ኪዳንም ይሁን በአዲስ ኪዳን ምንም አይነት ስላሴያዊ አስተምህሮ አልቀረበም። እሰራኤል የሚያውቀው አንድ አምላክ ብቻ ነው። ኢየሱስ ክርስቶስ የእግዚያብሄር ልጅ እንጂ እግዚያብሄር አደለም።
ወንድሞች / እህቶች ይህን የተሳሳተ ትምሕርት አምብባቹሁ አትረበሹ በየጊዚዜው የ ክርስቶስን አምላክነት የ ሚክዱ ክርስቲያን ነን የሚሉ ይመጣሉና።
ይህ ደሞ የ ዘመናችን የ ወች ታወር ተከታይ ሆኖ ክርስቶስን ይክዳል እና ፤ ፈጣሪ ክርስቶስ እንዲገልጸለት እንጸልይ።

በ ትንቢተ ኢሳይያስ ፈጣሪ ይህን ይላል

5፤6፤ እኔ እግዚአብሔር ነኝ ከእኔም ሌላ ማንም የለም፤ ከእኔም በቀር አምላክ የለም፤ በፀሐይ መውጫና በምዕራብ ያሉ ከእኔ በቀር ማንም ሌላ እንደሌለ ያውቁ ዘንድ አስታጠቅሁህ፥ አንተ ግን አላወቅኸኝም፤ እኔ እግዚአብሔር ነኝ፥ ከእኔም ሌላ ማንም የለም።
40፡25፤ እንግዲህ እተካከለው ዘንድ በማን መሰላችሁኝ? ይላል ቅዱሱ።

ክርስቶስም በ የዮሐንስ ወንጌል 10፡30 "እኔና አብ አንድ ነን" ያለውን እናስብ።

በ የዮሐንስ ወንጌል 1፡1 ክርስቶስ እግዚአብሔር እንደሆነም ያለ እሱም ምንም ምን እንደሌለ ተጸፎል።

1፡1 በመጀመሪያው ቃል ነበረ፥ ቃልም በእግዚአብሔር ዘንድ ነበረ፥ቃልም እግዚአብሔር ነበረ
2 ይህ በመጀመሪያው በእግዚአብሔር ዘንድ ነበረ።
3 ሁሉ በእርሱ ሆነ፥ ከሆነውም አንዳች ስንኳ ያለ እርሱ አልሆነም።

እናም ወንድሞች / እህቶች እዚ ድረ ገልጽ ላይ በተደጋጋሚ የ ክርስቶስን አምላከነት ሊያጎሉ የሚጥሩ አሉና ክርስቶስ ይቅር እንዲላቸው
ጸልዩላቸው። [/color]
“በመጀመሪያው ቃል ነበረ፥ ቃልም በእግዚአብሔር ዘንድ ነበረ፥ ቃልም እግዚአብሔር ነበረ።ይህ በመጀመሪያው በእግዚአብሔር ዘንድ ነበረ።” ዮሐ.1፡1-2
ዓሣ አጥማጁ ሐዋርያ ጌታ ከቅድስት ድንግል ማርያም የተወለደውን ደኃራዊ ልደቱ በሌሎች ወንጌላውያን የተነገረ ስለሆነ ቀዳማዊ ልደቱን ይነግረን ዘንድ ይቻኰላል፡፡ በእርግጥም “የድንግል ማርያም ልጅ” ብሎ የሚያቆም ካለ እኛ እርሱን አንሰማውም፤ “በመጀመሪያው ቃል ነበረ፥ ቃልም በእግዚአብሔር ዘንድ ነበረ” ሊለንም ይገባዋል እንጂ፡፡ አንዳንድ ሰዎች “ወልድ ልጅ ሆኖ ሳለ እንዴት ከአባቱ አያንስም?” ብለው ይጠይቁናል፡፡ እኛም የማይመረመር መሆኑንና የነብዩን ቃል ጠቅሰን እንዲህ ብለን እንመልስላቸዋለን፡- “መኑ ይነግር ልደቶ- ከአብ ያለ እናት የተወለደበት ቀዳማዊ ልደቱን ማን ይናገራል? እንዴትስ ሊመረመር ይችላል? እኛ፡ አብ ለልጁ አባት ሲባል አገኘነው እንጂ እንደምን እንደወለደው አናውቅም” /ኢሳ.53፡8/፡፡ ሐዋርያው “በመጀመርያው” ብሎ ሲነግረንም ከእርሱ በፊት ማንም እንዳልነበረ ለመግለጽ ነውና፡፡ ምንም እንኳን “በመጀመርያ” የሚለው አገላለጽ በመጽሐፍ ቅዱስ የተለያየ ትርጕም ቢኖረውም አሁን ወንጌላዊው እየነገረን ያለው ግን ቀዳማዊ ቃል ተራሮች ሳይወለዱ፥ ምድርም ዓለምም ሳይሠሩ፥ ከዘላለም አንሥቶ እንደ ነበረ ነው /መዝ.90፡2/፡፡ ዮሐንስ “በመጀመርያው” የሚል ደካማ አገላለጽ ከመጠቀም ውጪ ሌላ የተሻለ ቋንቋ ማግኘት አልቻለም፡፡ ሊቀ ነብያት ሙሴ “በቀዳሚ ገብረ እግዚአብሔር ሰማየ ወምድረ- በመጀመርያ እግዚአብሔር ሰማይንና ምድርን ፈጠረ” ካለው ጋር ንባብ ቢያሳብረውም ምሥጢር አያሳብረውም፡፡ ነብዩ “በቀዳሚ ዕለት፣ በቀዳሚ ሰዓት ሰማይና ምድር ተፈጠሩ” እያለን ነው፡፡ ይህም ማለት ለእነዚህ ፍጥረታት በዕለተ እሑድ መነሻ፣ መጀመርያ አላቸው፤ ቀዳማዊ ቃል ወልደ እግዚአብሔር ግን ለዘመኑ ጥንት፣ መነሻ፣ መጀመርያ ለሕይወቱም ፍጻሜ የለውም፤ እርሱ አልፋና ኦሜጋ ነው /ዕብ.7፡3፣ ራዕ.22፡13/፡፡ ለዚህም ነው ሐዋርያው “ቃልም በእግዚአብሔር ዘንድ ነበረ” በማለት ለዓይን ጥቅሻ ታህል ቅጽበት እንኳን የባሕርይ አባቱ የባሕርይ ልጁን በዘመን እንደማይቀድመው የነገረን፡፡ መሴም ቢሆን “በመጀመርያ እግዚአብሔር ሰማይንና ምድርን ፈጠረ” አለን እንጂ (ሎቱ ስብሐትና) “ወልድን ፈጠረ” አላለንም /ዘፍ.1፡1/፡፡ አካለዊ ቃል ወልድማ ሁሉንም የፈጠረ እግዚአብሔር ነው /ቆላ.1፡16/፡፡ የማያምኑበት ባያምኑበትም እኛስ ሙሴ ስለ እርሱ የጻፈለትን ቀዳማዊ ቃል ያህዌ-Johovah እንደ ሆነ እናምናለን /ዮሐ.5፡46፣ ዮሐ.8፡25/፡፡

ይህ የተሰወረባቸው ሰዎች የማይቀላቀለውን ሲቀላቅሉ “ነበረ” እና “ተፈጠረ” አንድ ነው ሊሉን ይሞክራሉ፡፡ ነገር ግን “ነበረ” የሚለው አገላለጽ ለሰዎች ሲቀጸል ኃላፊ ጊዜን የሚያመለክት ሲሆን ለእግዚአብሔር ሲቀጸል ግን ዘላለማዊነትን የሚያለመክት መሆኑን እንነግራቸዋለን፡፡ ምክንያቱም እግዚአብሔር ከጊዜና ከቦታ ቀመር ውጪ ነውና፡፡ ይህንንም የምናውቀው ሐዋርያው “በመጀመሪያው ቃል ነበረ” እያለን መልሶ ደግሞ “ቃልም በእግዚአብሔር ዘንድ ነበረ፤ ቃልም ራሱ እግዚአብሔር ነበረ” ስለሚለን ነው፡፡

ወንጌላዊው እየነገረን ያለው ዓይነት “ቃል” እኛ እንደምንናገረው ዓይነቱ ዝርው (ብትን) ቃል ሳይሆን አካል ያለውን ቃል ነው፡፡ የእኛ ቃል ወዲያው እንደተናገርነው ወደ አለመኖር ይለወጣል፤ አካላዊ ቃል ወልደ እግዚአብሔር ግን ሁሌ ያው ነው፤ አይለወጥም /ሚል.3፡6/፡፡ የእኛ ዝርው ቃል ከልብ ተገኝቶ ህልው ሆኖ ሲኖር አማርኛም ይሁን ትግርኛ አይታወቅም፡፡ ነገር ግን ልገለጽ ባለ ጊዜ በአንደበት እንደሚገለጽ ሁሉ አካላዊ ቃል ወልድም ከአብ ተገኝቶ በአብ ህልው ሆኖ ሲኖር ልገለጽ ባለ ጊዜ በሥጋ ተገልጧል /ዮሐ.14፡9፣ ገላ.4፡4/፡፡ እግዚአብሔር ወልድ ከዘላለም አንሥቶ ከባሕርይ አባቱ ጋር አለ፤ ነገር ግን አሁን እየተመለከትን ያለነው በሥልጣን ሳይሆን በአካል ከአባቱ የተለየ መሆኑን ነው፡፡

እንዴት ይደንቃል?! ሙሴ በጊዜ ውስጥ ተወስኖ ይጽፋል፤ ይህ ዓሣ አጥማጅ ሐዋርያ ግን ከምናየው ሰማይና ምድር ያልፍና በደቂቃና በሴኮንድ ወደማይቆጠረው ዘላለማዊነት ያስገባናል፤ ሙሴ ከነገረን መጀመርያ አስወጥቶም መጀመርያ ወደሌለው መጀመርያ ይወስደናል፡፡ ወደዚያ ስንሄድም አካላዊ ቃል አምላክ ወልደ አምላክ፣ ከብርሃን የተገኘ ብርሃን፣ ከጥበብ የተገኘ ጥበብ፣ ከእውነት የተገኘ እውነት፣ ከማይቸገር የተገኘ የማይቸገር፣ ከማይጠፋ የተገኘ የማይጠፋ፣ ከማይፈርስ የተወለደ የማያረጅ፣ ከማያንቀላፋ የተገኘ የማይተኛ፣ ከማይጨልም የተገኘ የማይጠቁር፣ ከማይመረመር የተወለደ የማይለይ፣ ድካም ከሌለበት የተወለደ የማይደክም፣ ከማይበቀል የተወለደ የማይቀየም፣ ከማይጐድል የተወለደ የማይጐድል፣ ከማያድፍ የተገኘ የማይረክስ መሆኑን እንረዳለን፡፡ ይህ ምን ማለት እንደ ሆነ ግን በእኛ ደካማ ቃላት መግለጽ አይቻለንም፡፡ የምናውቀው ሁሉ በከፊል ነውና /1ቆሮ.13፡12/፡፡ በእምነት መሠላል ብቻ ወደዚህ እንደርሳለን፡፡
“ሁሉ በእርሱ ሆነ፥ ከሆነውም አንዳች ስንኳ ያለ እርሱ አልሆነም። በእርሱ ሕይወት ነበረች፥ ሕይወትም የሰው ብርሃን ነበረች። ብርሃንም በጨለማ ይበራል፥ ጨለማም አላሸነፈውም።” ዮሐ.1፡3-5

አዎ! የወንጌላዊው ዓላማ ሥነ-ፍጥረትን ሳይሆን የየሥነ-ፍጥረት ሁሉ ምንጭ ማን እንደሆነ ማስተዋወቅ ነው፡፡ እነዚህ ፍጥረታት ከመፈጠራቸው በፊት አልነበሩም፤ እርሱ ግን ከዘላለም አንሥቶ በእግዚአብሔር ዘንድ አለ /ዘጸ.3፡14/፡፡ ሁሉንም የፈጠረ ፈጣሪ “ፍጡር ነው” ይሉት ዘንድ አንዳንዶች እንዴት ደፈሩ?!፡፡ ወልድ ፍጡር ከሆነስ ከእርሱ በፊት የነበረችውን ጊዜ ማን ሊፈጥራት ነው? ወንጌላዊው ግን “ከተፈጠረውም አንዳች ስንኳ ያለ እርሱ የተፈጠረ የለም” ነው ያለን፡፡ በአመክንዮም (By Logic) ሸክላ ከሸክላ ሠሪው አይቀድምም /ዕብ.1፡8/፡፡

አንድ ነገር ግን ታስተውሉ ዘንድ እንማልዳችኋለን፡፡ ወንጌላዊው፡-“ሁሉ በእርሱ ተፈጠረ፥ ከተፈጠረውም አንዳች ስንኳ ያለ እርሱ አልተፈጠረም” ስላለ ጣዖት፣ ኃጢአትና ክፋት ሁሉ በእግዚአብሔር ተፈጠሩ ማለት አይደለም፡፡ ምክንያቱም እነዚህ ሁሉ የኃጢአት ውጤቶች ናቸውና፡፡ ስለዚህ ፈጣሬ ዓለማት አካላዊ ቃልን ማመን ሕይወትን ይሰጣል፡፡ አዎ! እርሱ ከሕይወት የተገኘ የሕይወት ሁሉ ምንጭ ነው፤ ከእውነት የተገኘ እውነት እንጂ እውነትን ቆይቶ የተማረ ፍጡር አይደለም፡፡ እርሱ፡ ሲሞት እንኳን ሕይወትን የሚሰጥ ዕፀ ሕይወት ነው፡፡ ዕፀ ሕይወቱም እንበላው ዘንድ አደለን፤ ይኸውም እኛን ስለ መውደድ መጥቶ ያዳነን ቅዱስ ሥጋውና ክቡር ደሙ ነው፤ በበላነው ጊዜም ክፋንና ደጉን የምናውቅበት ዕውቀትን አገኘን፡፡
እርሱ ብርሃን ብቻ ሳይሆን ብርሃን ሰጪም ነውና በአካላዊ ቃል ሞትና ትንሣኤ ብርሃን ወጣልን፡፡ ዐይነ ስውር የሆነ ሰው (የማያምን) ፀሐይ ብትኖርም እርሱ ስለማያያት እስከ አሁን ድረስ በጨለማ ውስጥ አለ፡፡ እኛም ቅዱስ ጳውሎስ እንደነገረን ቀድሞ ጨለማ ነበርን፥ አሁን ግን በጌታ ብርሃን ነን /ኤፌ.5፡8/፡፡ ስለዚህ ከእንግዲህ ወዲህ “ወልድ ፍጡር ነው” ከሚሉት ጋር በጨለማ ውስጥ አንኖርንም፡፡ አካላዊ ቃልን ስናምን ጨለማ ከእኛ ተገፎ ይጠፋል፤ ሞት ከእኛ ይርቃል፣ ክህደት ከእኛ ይወገዳል፤ በአማናዊው ብርሃን ተሸንፏልና ሞት በእኛ ላይ ድል የሚያደርግበትን ሥልጣን ያጣል /1ቆሮ.15፡55-57/፡፡

እንግዲያስ ተወዳጆች ሆይ! ይህ አካላዊ ቃል፣ ከዘላለም አንሥቶ ከአባቱ ጋር የነበረው ወልድ፣ ከጊዜና ከቦታ ከመታየትም ውጪ የሆነው አምላክ፣ አሁን ስለ እኛ ብሎ የእኛን ሥጋ ለብሶ ስለ ታየ፤ ልዑል ሲሆን ዝቅ ስለ አለ፤ ያድነንም ዘንድ በጊዜና ቦታ ተወስኖ ስለ መጣ፤ ከፀሐይና ከጨረቃ አቆጣጠር ውጪ ሆነን ከእርሱ ጋር ለዘላለም እንኖር ዘንድ ዘመን ስለ ተቆጠረለት በእርሱ ዘንድ ጽርፈትን (ስድብን) ከመናገር እንቆጠብ፡፡
ገ/እግዚአብሔር ኪደ (ለበለጠ መረጃ mekrez.blgspot.com ይጐብኙ). ጌታ ይባርካቹ!

3 መልሶች

+2 ድምጾች
ስላሴ ወይም በእንግሊዝኛው Trinity የሚለው ቃል ሶስነትን የሚያሳይ ቃል ነው። የስላሴ ቃል ወይም ትምህርቱ በቀጥታ መጽሐፍ ቅዱስ ውስጥ የለም፤ ሆኖም በብዙ የክርስትና ሃይማኖቶች ከዋናዎቹ አተምህሮቶች (doctrines) እንደ አንዱ የሚታይ ነው።

ይህ ትምህርት በመጀመሪያው የኒሲያ ጉባዬ ላይ ከክርስቶስ ልደት በኋላ በ325 ዓመተ ምህረት (እ.ኤ.አ) እንደ መሠረታዊ አተምህሮት የተወሰደ ትምህርት ነው።

የትምህርቱ መነሻ የሆነው በተለይ በአዲስ ኪዳን እግዚአብሔር፣ ኢየሱስ ክርስቶስና መንፈስ ቅዱስ አብረው የተጠቀሱባቸውን ክፍሎች ከሌሎች እግዚአብሔር አንድ ብቻ እንደሆነ ከሚናገሩ ክፍሎች ጋር እንዴት ማሳታረቅ ይቻላል ለሚለው ጥያቄ መልስ ለመስጠት ነው።

መጽሐፍ ቅዱስ ከብሉይ ኪዳን ጀምሮ እግዚአብሔር አንድ ብቻ እንደሆነ ይናገራል። ለምሳሌ፦
Quote:
ኦሪት ዘዳግም 6፡4 "እስራኤል ሆይ፥ ስማ አምላካችን እግዚአብሔር አንድ እግዚአብሔር ነው "

የማርቆስ ወንጌል 12፥29 "ኢየሱስም መልሶ እንዲህ አለው፦ ከትእዛዛቱ ሁሉ ፊተኛይቱ፤ እስራኤል ሆይ፥ ስማ፤ ጌታ አምላካችን አንድ ጌታ ነው"፥

በሌላ በኩል ደግሞ እግዚአብሔር፣ ኢየሱስ ክርስቶስና መንፈስ ቅዱስ አብረው የተጠቀሱባቸው ቦታዎች በአዲስ ኪዳን ይገኛሉ። ለምሳሌ፦
Quote:
2ኛ ወደ ቆሮንቶስ ሰዎች 13፡14 "የጌታ የኢየሱስ ክርስቶስ ጸጋ የእግዚአብሔርም ፍቅር የመንፈስ ቅዱስም ኅብረት ከሁላችሁ ጋር ይሁን። አሜን።"

የማቴዎስ ወንጌል 28፡19-20 "እንግዲህ ሂዱና አሕዛብን ሁሉ በአብ በወልድና በመንፈስ ቅዱስ ስም እያጠመቃችኋቸው፥ ያዘዝኋችሁንም ሁሉ እንዲጠብቁ እያስተማራችኋቸው ደቀ መዛሙርት አድርጓቸው፤ እነሆም እኔ እስከ ዓለም ፍጻሜ ድረስ ሁልጊዜ ከእናንተ ጋር ነኝ። "

የስላሴ ትምህርት እንግዲህ እንደዚህ ያሉትን ሁለት አይነት የመጽሐፍ ቅዱስ ክፍሎች ለማስማማትና ለማስታረቅ የሚሞክር ትምህርት ነው። የትምህርቱም ይዘት የሚከተለውን ይመስላል፦

እግዚአብሔር አንድ ነው ሆኖም ሶስት ስብእናዎች (persons) አሉት። ስለዚህ አንድ እግዚአብሔር የሚባለው አብን፣ ወልድንና መንፈስ ቅዱስን አጠቃልሎ ነው የሚል ትምህርት ነው። ሶስቱም ራሳቸውን የቻሉና የማይበላለጡ እኩል ስብእናዎች (persons) ናቸው። ማለትም አብ ወልድ አይደለም ወይም ወልድ መንፈስ ቅዱስ አይደለም ወዘተ። እንዲሁም አብ ከወልድ አይበልጥም ወልድም ከመንፈስ ቅዱስ እኩል ነው ወዘተ። እናም አንድ እግዚአብሔር ሲባል ሶስቱን አጠቃልሎ ነው ብሎ የሚያምን ትምህርት ነው። ለዚህም ነው ይህን የሚያምኑ ክርስቲያኖች ብዙ ጊዜ እግዚአብሔር አብ፣ እግዚአብሔር ወልድ እና እግዚአብሔር መንፈስ ቅዱስ እያሉ የሚጠሩት። ምንም እንኳን እንዲህ ያለ አባባል መጽሐፍ ቅዱስ ውስጥ ባይገኝም።

የስላሴ ትምህርት ከዚህ በተጨማሪ የክርስቶስን መለኮታዊነት (divinity) ለማይቀበሉም መከላከያ የታሰበ ትምህርት ነው። ኢየሱስ ሰው ብቻ ነው ወይም ፍጥረት ብቻ ነው እንጂ አማላካዊ ባሕርይ የለውም የሚሉትንም ለመቃወም ኢየሱስን ከእግዚአብሔር እኩል አስተካክሎ በማስቀመጥ መልስ የሰጠ ትምህርት ነው።

የግሌ አስተያየት

በነገራችን ላይ የስላሴ ትምህርት ከክርስቶስ ልደት በኋላ ከ325 ዓመት በኋላ የመጣ ትምህርት መሆኑን ስለማያውቁ፤ ብዙ ክርስቲያኖች ይህ ትምህርት የደህንነት ዋናው ትምህርት ይመስላቸዋል። እናም በትምህርቱ ላይ ጥያቄ ያለው ሰው ልክ በክርስቶስ እንደማያምንና ከክርስቶስ ደህንነት እንደወደቀ አድርገው ነው የሚያዩት። ይሄ በእኔ አመለካከት ትክክል አይደለም። የትም ቦታ በመጽሐፍ ቅዱስ፤ አብ ወልድ መንፈስ ቅዱስ አንድ ላይ አንድ እግዚአብሔር ናቸው ብለህ ካላመንክ አትድንም የሚለ ነገር የለም። ስለዚህ መጽሐፍ ቅዱስን መሠረት ባደረገ እንዲሁም በትህትና ለመማር በሚፈልግ ልብ ሊጠየቅና ሊመረመር ይችላል ባይ ነኝ።

የስላሴ ትምህርት በአንድ ጎኑ፤ አንድ የታወቀ የመጽሐፍ ቅዱስ ታሪክ ሊቅ "የስላሴ ትምህርት ባይኖር ኖሮ ትምህርቱ መፈጠሩ አይቀርም ነበር" ብሎ እንዳለው፤ በእርግጥ መጽሐፍ ቅዱስ ላይ ያሉ አንዳንድ ፍንጮች ወደ ስላሴ ትምህርት የሚያመለክቱ ይመስላሉ።

ሆኖም እንደ እኔ አመለካከት፤ ልክ የመጽሐፍ ቅዱስን አንድ ጫፍ ብቻ ይዘው "ኢየሱስ የተፈጠረ ሰው ብቻ ነው፤ ምንም መለኮታዊ ባሕርይ የለውም " እንደሚሉትና ወደ አንድ ጎን እንደሚለጥጡት፤ የስላሴ ትምህርት ደግሞ በተቃራኒው የተለጠጠ ነው ብዬ አምናለሁ።

ይሄን ያልኩበት መጽሐፍ ቅዱሳዊ የሆኑ ምክንያቶች አሉኝ።
  • መጽሐፍ ቅዱስ ኢየሱስ መለኮታዊ ወይም አማላካዊ ባሕርይ እንዳለው በግልጽ ያስተምራል። እናም ኢየሱስ ልክ እንደ እግዚአብሔር አምልኮና ውዳሴ እንደሚቀበል ተጽፎአል። ሆኖም የኢየሱስን አማላካዊ ባሕርይ የጻፉት እነ ጳውሎስ ራሳቸው ግን አንድ እግዚአብሔር ሲሉ የትም ቦታ አብን፣ ወልድንና መንፈስ ቅዱስን በአንድ ላይ አድርገው አይደለም። መጽሐፍ ቅዱስ አንድ እግዚአብሔር ብሎ የሚጠራው ሁል ጊዜም ቢሆን አብን ብቻ ነው።
    Quote:
    „1ኛ ጢሞቴዎስ 2፣5 "አንድ እግዚአብሔር አለና፥ በእግዚአብሔርና በሰውም መካከል ያለው መካከለኛው ደግሞ አንድ አለ፥ እርሱም ሰው የሆነ ክርስቶስ ኢየሱስ ነው“

    1ኛ ቆሮንቶስ 8፣5-6 „መቼም ብዙ አማልክትና ብዙ ጌቶች አሉ፤ ነገር ግን በሰማይ ሆነ በምድርም ሆነ አማልክት የተባሉ ምንም ቢኖሩ፥ ለእኛስ ነገር ሁሉ ከእርሱ የሆነ እኛም ለእርሱ የሆንን አንድ አምላክ አብ አለን፥ ነገር ሁሉም በእርሱ በኩል የሆነ እኛም በእርሱ በኩል የሆንን አንድ ጌታ ኢየሱስ ክርስቶስ አለን።“

    ኤፌሶን 4፣4-6 „በመጠራታችሁ በአንድ ተስፋ እንደ ተጠራችሁ አንድ አካልና አንድ መንፈስ አለ፤ አንድ ጌታ አንድ ሃይማኖት አንዲት ጥምቀት፤ ከሁሉ በላይ የሚሆን በሁሉም የሚሠራ በሁሉም የሚኖር አንድ አምላክ የሁሉም አባት አለ።“

    የማርቆስ ወንጌል 10፣18 „ኢየሱስም፦ ስለ ምን ቸር ትለኛለህ? ከአንዱ ከእግዚአብሔር በቀር ቸር ማንም የለም።“

    1ኛ ጢሞቴዎስ 1፣17 „ብቻውን አምላክ ለሚሆን ለማይጠፋው ለማይታየውም ለዘመናት ንጉሥ ምስጋናና ክብር እስከ ዘላለም ድረስ ይሁን፤ አሜን።“

    1ኛ ጢሞቴዎስ 6፣16 „እርሱ ብቻ የማይሞት ነው፤ ማንም ሊቀርበው በማይችል ብርሃን ይኖራል፤ አንድ ሰው እንኳ አላየውም ሊያይም አይቻለውም፤ ለእርሱ ክብርና የዘላለም ኃይል ይሁን፤ አሜን።“

    ስለዚህ አንድ እግዚአብሔር ማለት ሶስቱን ማለትም አብን፣ ወልድንና ኢየሱስን በአንድነት አጠቃልሎ ነው የሚለው የስላሴ ትምህርት ፈጽሞ መጽሐፍ ቅዱስ ላይ የለም። መጽሐፍ ቅዱስ ሁሌም አንዱ እግዚአብሔር እያለ የሚጠራው አብን ብቻ ነውና።

    እነ ጳውሎስ ታዲያ በአንድ በኩል ኢየሱስ መለኮታዊና አምላካዊ ባሕርይ እንዳለው ይጽፋሉ፤ ይህም ሆኖ ግን አንዱ እግዚአብሔር የሚባለው ግን አብ ብቻ እንደሆነም ይናገራሉ። ኢየሱስ መለኮታዊ ባሕርይ ስላለው፤ ያ ከብሉይ ኪዳን ዘመን ጀምሮ አንዱ እግዚአብሔር እየተባለ ሲጠራ የነበረው አብ ውስጥ ኢየሱስንና መንፈስ ቅዱስን ደምረው በአንድነት ነው አንዱ እግዚአብሔር የሚባለው ወደሚል መደምደሚያ አልደረሱም። ኢየሱስ መለኮታዊና አምላካዊ ባሕርይ አለው? አዎ ሆኖም ግን አሁንም ቢሆን አንዱ እግዚአብሔር ብለው እነ ጳውሎስ የሚጠሩት አብን ብቻ ነው። ይህ ከስላሴ ትምህርት ይለያል።

  • አብም፣ ኢየሱስም፣ መንፈስ ቅዱስም የማይበላለጡ እኩል ናቸው የሚለው የስላሴ ትምህርት በእኔ አመለካከት መጽሐፍ ቅዱሳዊ መሠረት የለውም። መጽሐፍ ቅዱስ በግልጽና በማያወላውል ሁኔታ ኢየሱስ ከአብ እንደሚያንስና አብ ኢየሱስን መብለጥ ብቻ ሳይሆን የኢየሱስ አምላክም እንደሆነ ተጽፎአል።

    ይህ ደግሞ ብዙዎች እንደሚመስላቸው ኢየሱስ በምድር እንደ ሰው ሲመላለስ ብቻ አይደለም። ኢየሱስ "ከእኔ አብ ይበልጣል" ሲል ብዙ የስላሴ አማኞች የሚመስላቸው ኢየሱስ በአምላክነቱ ሳይሆን በሰውነቱ ራሱን ከእግዚአብሔር ጋር እያወዳደረ ይመስላቸዋል። ሰውማ ከእግዚአብሔር እንደሚያንስ እንኳን አይሁዳዊ የሆኑ ደቀመዛሙርቱ ይቅርና አሕዛብም ያውቃሉ። ኢየሱስ ወልድን ወይም አማላካዊ ባሕርይውን ነው ከአብ ጋር የሚያወዳድረው። ይህ ብቻ አይደለም ከሙታን ተነስቶ በአብ ዘንድ በክብርም ከሆነ በኋላ አሁንም ከአብ እንደሚያንስ የሚያሳዩ ነገሮች በራእይ መጽሐፍ ላይ ተጽፈዋል።

    እስቲ አንዳንድ ምሳሌዎችን እንመልከት፦
    Quote:
    የዮሐንስ ወንጌል
    5፥26 አብ በራሱ ሕይወት እንዳለው እንዲሁ ደግሞ ለወልድ በራሱ ሕይወት እንዲኖረው ሰጥቶታልና።

    Amplified Bible
    John 5:26 "For even as the Father has life in Himself and is self-existent, so He has given to the Son to have life in Himself and be self-existent."

    በዚህ ክፍል የምንመለከተ ወልድ የአብ አይነት self-existent ሕይወት እንዳለው የሚናገር ነው። ማለትም ሕይወት በራሱ ያለውና ሕይወትን ማመንጨት የሚችል ሕይወት አብ እንዳለው እንዲሁ ወልድ አለው። ይህን መቼም ኢየሱስ የሚናገረው ስለ ምድራዊ ሕይወቱ እንዳልሆነ ግልጽ ነው። ታዲያ ይህን የአብ አይነት self-existent የሆነ ሕይወት እንኳን ለኢየሱስ የሰጠው አብ እንደሆነ ነው የሚናገረው።

    ይህም ብቻ አይደለም የሚከተለቱም ክፍሎች ሁሉ የሚያሳዩት አብ የኢየሱስ የበላይ ጌታና አምላክ እንደሆንና ኢየሱስ ደግሞ የአብ ታዛዥ ልጅና የበታች እንደሆነ ነው።
    Quote:
    1ኛ ቆሮንቶስ 11፡3 „ነገር ግን የወንድ ሁሉ ራስ ክርስቶስ፥ የሴትም ራስ ወንድ፥ የክርስቶስም ራስ እግዚአብሔር እንደ ሆነ ልታውቁ እወዳለሁ።“

    ዮሐንስ 5፡19 „ስለዚህ ኢየሱስ መለሰ እንዲህም አላቸው፦ እውነት እውነት እላችኋለሁ፥ አብ ሲያደርግ ያየውን ነው እንጂ ወልድ ከራሱ ሊያደርግ ምንም አይችልም፤ ያ የሚያደርገውን ሁሉ ወልድ ደግሞ ይህን እንዲሁ ያደርጋልና።“

    የዮሐንስ ወንጌል 14፥28 "እኔ እሄዳለሁ ወደ እናንተም እመጣለሁ እንዳልኋችሁ ሰማችሁ። የምትወዱኝስ ብትሆኑ ከእኔ አብ ይበልጣልና ወደ አብ በመሄዴ ደስ ባላችሁ ነበር።"

    ኢየሱስ ራሱ ሲናገር ስለ ዓለም ፍጻሜ፤ ስለዚያች ቀንና ሰዓት ከአብ በስተቀር የሰማይ መላእክትም ቢሆኑ ወልድም ቢሆን እንደማያውቅ ተናገሮአል። ይህም ብቻ አይደለም፤ በራእይ መጽሐፍ ለዮሐንስ የተገለጠለት ራእይ ራሱ፤ አብ ለኢየሱስ የሰጠው ራእይ እንደሆነ ተጽፎአል።
    Quote:
    የማቴዎስ ወንጌል 24፣36 „ስለዚያች ቀንና ስለዚያች ሰዓት ግን ከአባት ብቻ በቀር የሰማይ መላእክትም ቢሆኑ ልጅም ቢሆን የሚያውቅ የለም።“

    የዮሐንስ ራእይ 1፡1 "ቶሎ ይሆን ዘንድ የሚገባውን ነገር ለባሪያዎቹ ያሳይ ዘንድ እግዚአብሔር ለኢየሱስ ክርስቶስ የሰጠው በእርሱም የተገለጠው ይህ ነው፥ ኢየሱስም በመልአኩ ልኮ ለባሪያው ለዮሐንስ አመለከተ፥ "

    ከትንሳኤም በኋላ እግዚአብሔር የኢየሱስ አምላክ እንደሆነና ከኢየሱስ የሚበልጥ እንደሆነ ብዙ የሚያሳዩ ጽሑፎች በአዲስ ኪዳን እናገኛለን። ሁለቱን ለመጥቀስ ያህል፦
    Quote:
    1ኛ ቆሮንቶስ 15፣27-28 „ሁሉን ከእግሩ በታች አስገዝቶአልና። ነገር ግን፦ ሁሉ ተገዝቶአል ሲል፥ ሁሉን ካስገዛለት በቀር መሆኑ ግልጥ ነው። ሁሉ ከተገዛለት በኋላ ግን እግዚአብሔር ሁሉ በሁሉ ይሆን ዘንድ በዚያን ጊዜ ልጁ ራሱ ደግሞ ሁሉን ላስገዛለት ይገዛል።“

    የዮሐንስ ራእይ 3፣12 „ድል የነሣው በአምላኬ መቅደስ ዓምድ እንዲሆን አደርገዋለሁ፥ ወደ ፊትም ከዚያ ከቶ አይወጣም፤ የአምላኬን ስምና የአምላኬን ከተማ ስም፥ ማለት ከሰማይ ከአምላኬ ዘንድ የምትወርደውን አዲሲቱን ኢየሩሳሌምን፥ አዲሱንም ስሜን በእርሱ ላይ እጽፋለሁ።“


ማጠቃለያ

መጽሐፍ ቅዱስ በግልጽ ኢየሱስ መለኮታዊና አምላካዊ ባሕርይ ያለው የዛ የአንዱ እግዚአብሔር ልጅ እንደሆነ ያስተምራል። ኢየሱስ የዛ የአንዱ እግዚአብሔር የማይታየው ባሕርይ መገለጫና የክብሩ መንጸባረቂያም እንደሆነ ተጽፎአል። ሆኖም ግን ያ አንዱ እግዚአብሔር፤ አብን ወልድንና መንፈስ ቅዱስን በአንድነት አጠቃልሎ ነው የሚል ነገር አያስተምርም። ይባስ ብሎ ደግሞ አብና ኢየሱስ አይበላለጡም የሚባል ትምህርት ፈጽሞ መጽሐፍ ቅዱስ ውስጥ አይገኝም።

በአንድ በኩል ኢየሱስ አማላካዊ ባሕርይ እንደሌለውና ሰው ብቻ እንደሆነ የሚል ትምህርት በተቃራኒው በሌላ በኩል ደግሞ አንዱ እግዚአብሔር የሚባለው ሶስቱም በአንድነት ነው እናም ኢየሱስም ከአንዱ ከእግዚአብሔር ጋር እኩል ነው የሚል ትምህርት ሁለቱም የተለጠጡና ሚዛናዊውን የመጽሐፍ ቅዱስ ትምህርት የሚያንጸባርቁ አይደሉም እላለሁ።

እነ ጳውሎስ አንዱን እግዚአብሔርን አብን፤ ብቸኛ አምላክ እያሉም እንዲሁ ደግሞ የኢየሱስን አምላካዊ ባሕርይ ይቀበሉ ነበር። እኛም እንዲህ ልናደርግ ይገባል እላለሁ።
Quote:
ወደ ዕብራውያን 1፥3 "እርሱም የክብሩ መንጸባረቅና የባሕርዩ ምሳሌ ሆኖ፥ ሁሉን በስልጣኑ ቃል እየደገፈ፥ ኃጢአታችንን በራሱ ካነጻ በኋላ በሰማያት በግርማው ቀኝ ተቀመጠ፤"

ቆላስይስ 1፣15 „እርሱም የማይታይ አምላክ ምሳሌ ነው።“
5 ዓመታት በፊት ስም-አልባ የተመለሰ
5 ዓመታት በፊት የታረመ ስም-አልባ
ጌታ ይባርክ የኔ ዉንድም ብዙ ትምህርት አጊንቻለሁ ሁለተኛሁንም ጥያቄ ብተመልስልኝ ድስ ይለኛል
ዩሀንስ ከአዲስ አበባ
እነ ጳውሎስ እግዚያብሄር አብን ብቸኛ አምላክ እያሉ፡ ጌታ ኢየሱስን አምላክ አርገው አልተቀበሉም። ጳውሎስ አንድ አምላክ አብ አለን (1ኛ ቆሮ 8፡4 ) ብሎ ነው ያስተማረው። ኢየሱስ ጌታ መሲህ (የተቀባ ጌታ ነው። በዩሃንስ 10፡30-35 ላይ እንክዋን ራስህን አምላክ አርገሃል ሲሉት፡ ጌታ ኢየሱስ "እናንተ አማልክት ናችሁ አልሁ ተብሎ በህጋችሁ የተትሳፈ አደለምን?" ብሎ አምላክ የላከው መልእክተኛና የእግዚያብሄር ልጅ መሆኑን እንጂ፡ አምላክ ነኝ አላለም። እናም "እስራኤል ሆይ ስማ፡ ጌታ አምላካችን አንድ ጌታ ነው።" የሚለውን በዘዳግም ላይ ያለ አምላካዊ ህግ እንዳንተው እንጠንቀቅ።
ሰላም መጽሐፍ ቅዱስማ የኢየሱስን አምላካዊ ባሕርይ ከብሉይ ኪዳን ጀምሮ ነው የሚናገረው። ማለትም እርሱ ያ አንዱ እግዚአብሔር ነው እያለ ሳይሆን፤ ሰው ብቻ እንዳልሆነ፤ እግዚአብሔር አለምን በክርስቶስ እንደፈጠረ፣ ከመላእክትም እንደሚበልጥና ምድቡ ከአምላክ የዘር ምድብ ወይም class እንደሆነ ነው የሚነገረን። የዘሩ ምድብ ወይም የክብሩ ደረጃ ከአምላክ ጋር የሚመደብ ስለሆነም ነው በራእይ መጽሐፍ እንደምንመለከትው እርሱ ብቻ ከእግዚአብሔር ጋር አብሮ በመላእክትና በሰዎች ሲመለክና ለአምላክ ብቻ የሚገባውን ውዳሴና አምልኮ ሲቀበል የምንመለከተ። ስለዚህ ያንተ አመለካከት ከላይ በመልሴ ላይ እንደገለጥኩት ወደ አንዱ ያዘነበለ ነው። እስቲ የሚከተለቱን ጥቅሶች በደንብ ተመልከት፦

ትንቢተ ኢሳይያስ
9፥6 ሕፃን ተወልዶልናልና፥ ወንድ ልጅም ተሰጥቶናልና አለቅነትም በጫንቃው ላይ ይሆናል ስሙም ድንቅ መካር፥ ኃያል አምላክ፥ የዘላለም አባት፥ የሰላም አለቃ ተብሎ ይጠራል።

የዮሐንስ ወንጌል 1
1 በመጀመሪያው ቃል ነበረ፥ ቃልም በእግዚአብሔር ዘንድ ነበረ፥ ቃልም እግዚአብሔር(አምላክ) ነበረ።
...
14 ቃልም ሥጋ ሆነ፤ ጸጋንና እውነትንም ተመልቶ በእኛ አደረ፥ አንድ ልጅም ከአባቱ ዘንድ እንዳለው ክብር የሆነው ክብሩን አየን።

ወደ ፊልጵስዩስ ሰዎች
2፥6 እርሱ በእግዚአብሔር መልክ ሲኖር ሳለ ከእግዚአብሔር ጋር መተካከልን መቀማት እንደሚገባ ነገር አልቈጠረውም፥

የዮሐንስ ራእይ 5
11 አየሁም፥ በዙፋኑም በእንስሶቹም በሽማግሌዎቹም ዙሪያ የብዙ መላእክትን ድምፅ ሰማሁ፤ ቍጥራቸውም አእላፋት ጊዜ አእላፋትና ሺህ ጊዜ ሺህ ነበር፥
12 በታላቅም ድምፅ:- የታረደው በግ ኃይልና ባለ ጠግነት ጥበብም ብርታትም ክብርም ምስጋናም በረከትም ሊቀበል ይገባዋል አሉ
13 በሰማይና በምድርም ከምድርም በታች በባሕርም ላይ ያለ ፍጥረት ሁሉ በእነርሱም ውስጥ ያለ ሁሉ:- በረከትና ክብር ምስጋናም ኃይልም ከዘላለም እስከ ዘላለም በዙፋኑ ላይ ለተቀመጠው፥ ለበጉም ይሁን ሲሉ ሰማሁ።

ወደ ቆላስይስ ሰዎች 1
15-16 እርሱም የማይታይ አምላክ ምሳሌ ነው። የሚታዩትና የማይታዩትም፥ ዙፋናት ቢሆኑ ወይም ጌትነት ወይም አለቅነት ወይም ሥልጣናት፥ በሰማይና በምድር ያሉት ሁሉ በእርሱ ተፈጥረዋልና ከፍጥረት ሁሉ በፊት በኵር ነው። ሁሉ በእርሱና ለእርሱ ተፈጥሮአል።
ሰላም ወገኔ፡ በመጀመሪያ ስለቀናው መልስ አመሰግናለሁ። ወደ ነጥቡ ስመለስ፡ ኢየሱስ አንዱ አምላክ ካልሆነና አንዱ አምላክ አብ ብቻ ከሆነ፡ ኢየሱስ አምላክ በሚል ስም መጠራቱ፡ ኢየሱስን አምላክ አያደርገውም።

ለምሳሌ በእብራውያን 1፡8-9 ላይ " አምላክ ሆይ ዙፋንህ እስከዘላለም ድረስ ጸንቶ ይኖራል.....ስለዚህ እግዚያብሄር አምላክህ ከባልንጀሮችህ በላይ በደስታ ዘይት ቀባህ.." ይላል። ኢየሱስ አምላክ ተብሎ ቢጠራም፡ የራሱ የሆነ አምላክ እንዳለው ይህ ክልፍ ያሳያል። አምላክ ያለው አምላክ ምን ሊሆን እንደሚችል መረዳት ቀላል ነው። እግዚያብሄር፡ ሙሴን በፈርኦን ላይ አምላክ አድርጎት ነበር። በዩሃ 10፡30-35 ላይ ጌታ ኢየሱስ እንደተናገረውም፡ የእስራኤል ገዦች አማልክት ተብለው እንደተጠሩ መመልከት ይቻላል። ይህንን ክፍል በመዝሙር 82፡7-8 ስናይ "ነገር ግን እንደሰው ትሞታላችሁ" ይላቸዋል። ጌታ ኢየሱስም ሞቶ እንደነበር አስታውሱ። ሌላው ወደተነሱት ነጥቦች ልመለስ።

ኢሳ 9፡6 "ህጻን ተወልዶልናልና ወንድ ልጅም ተሰጥቶናል.....ስሙም ድንቅ፡ መካር፡ ሃያል አምላክ፡ የዘላለም አባት፡ የሰላም አለቃ..." ብሎ ያስቀምጣል። ይሄ ክፍል እንደሚናገረው፡ ከዚህ ቀደም አምላክ ሆኖ ለኖረ ፈጣሪ ሳይሆን፡ ወደፊት ለሚወለድ ህጻን የሚሰጥ ስም ነው። ኢሳያስ ይህንን ትንቢት ሲተነብይ፡ ኢየሱስ አልተወለደም ነበር። እናም ሊወለድ ላለው ህጻን ኢየሱስ የሚሰጡ ስሞች እንጂ፡ ኢየሱስ ሃያል አምላክ፤ የዘላለም አባት.....የነበረ ነው አይልም። እናም እነዚህን ስሞች እድዚያብሄር ነው የሰጠው መሆኑን መረዳት ያስፈልጋል። ለምሳሌ በማቲ 28፡20 ላይ ስልጣን ሁሉ ለኢየሱስ እንደተሰጠው ይናገራል። ይህ የሚያሳየው፤ ኢየሱስ ስልጣንን ከአብ እንደተቀበለ እንጂ በራሱ ያ ስልጣን እንዳለው አይደለም።

ዩሃ 1፡1-3 "በመጀመሪያ ቃል ነበረ፤ ቃልም በእግዚያብሄር ዘንድ ነበረ፤ ቃልም እግዚያብሄር ነበረ።" ይሄ ክፍል ብዙ ጊዜ ኢየሱስ ከአብ ጋር እንደነበረና አምላክ እንደነበረ የሚጠቀስ ክፍል ነው። እውነታው ግን ከዚህ የራቀ ነው። ቃል እንጂ ኢየሱስ በአብ ዘንድ ነበረ አይልም። ይህ ቃል በ 1ኛ ዩሃ 1፡1-4 ላይ እንደተጠቀሰው የህይወት ቃል እንጂ የራሱ ማንነት ያለው አምላክ አይደለም። በአብ ዘንድ የነበረ የተስፋ/የህይወት ቃል ነበር። ይህ ቃል ግን ስጋ የሆነው በኢየሱስ በኩል ነው። ማለትም ኢየሱስ ከመንፈስ ቅዱስ ሲጸነስ፤ ይህ የህይወት ቃል ስጋ ሆነ። ታየ፤ ተዳሰሰ ማለት ነው። ዩሃ 1፡1-3 ስለ ሁለት አማልክት አያወራም። በብሉይ ኪዳን ግዜ ፡ቃል የሚያመለክተው የእግዚያብሄር ቃልን እንጂ፡ ሌላ ቃል የሚባል አምላክን አይደለም። ለዚህ ነው በራእይ 19፡13 ላይ ስሙ የእግዚያብሄር ቃል ተብሎአል የሚለው። ቃል ስጋ የሆነው በኢየሱስ ስለሆነ ማለት ነው።

ፊልጵ 2፡6 "በክርስቶስ ኢየሱስ የነበረው ሃሳብ ቤናንተ ደግሞ ይሁን። እርሱ በእግዚያብሄር መልክ ሲኖር ሳለ፤ ከእግዚያብሄር ጋር መተካከልን መቀማት እንደሚገባ ነገር አድርጎ አልቆጠረውም።" ይህ ክፍልም ኢየሱስ ከእግዚያብሄር ጋር እኩል ሆኖ ይኖር እንደነበር በተደጋጋሚ ይጠቀሳል። በመጀመሪያ ማስተዋል የሚገባው ነበር፡ ክርስትያኖች የክርስቶስን (የተቀባውን ወይም የመሲሁን) ፈለግ እንዲከተሉ ነው። ጳውሎስ አምላክ የነበረው መሲህን ፈለግ ተከተሉ ነው እያለ ያለው ወይስ እንደእኛ ያለውን ሰው ፈለግ? ይሄንን መረዳት ጳውሎስ የጻፈውን እንድንረዳ ይጠቅመናል። "በእግዚያብሄር መልክ" (በግሪኩ ሞርፌ) ማለት የባሪያን መልክ ከሚለው ጋር አንድ ነው። ኢየሱስ ፍጹም ጻድቅ (እግዚያብሄርን ለመምሰል መጠራታችንን አስተውሉ) ቅዱስ ሆኖ ሳለ፤ ስለሰው ልጆች ሃጥያት ራሱን ዝቅ አድርጎ እንደሃጥያተኛ ተቆጠረ ነው ጳውሎስ እያለን ያለው። በፊልጵ 2፡9-11 ላይ እንደምንመለከተው እግዚያብሄር ኢየሱስን እጅግ ከፍ አድርጎታል ምክንያቱም ራሱን ዝቅ ስላደረገ ማለት ነው። ኢየሱስ አምላክ ከነበረ ወዴት ነው እግዚያብሄር ከፍ ያደረገው ብሎ መጠየቅም ጥበበኛነት ነው። እግዚያብሄር ለኢየሱስ የሰጠው ክብር ኢየሱስ ያልነበረው እንደሆነ ግልጽ ነው። ምክንያቱም እግዚያብሄር እጅግ ከፍ አደረገው፡ ከስምም ሁሉ በላይ የሆነውን ስም ሰጠው ይላል። በማቲ 28፡19 ላይም ስልጣን ሁሉ በሰማይና በምድር ተሰጠኝ ብሎአል። ለማጠቃለል ያህል፡ ፊልጵ 2 የሚናገረው፡ ጻድቅና ቅዱስ ሆኖ ይኖረ የነበረው መሱሁ ራሱን ዝቅ አድርጎ ለመስቀል ሞት ስለታዘዘ፡ እግዚያብሄር እጅግ ከፍ እንዳደረገው፡ ስለዚህም እኛም የዚህን ሰው (የኢየሱስን) ምሳሌ እንድንከተል ነው።

ራእይ 5 ላይ ኢየሱስ ምስጋና መቀበሉ አምላክ ለመሆኑ ማረጋገጫ ሊሆን አይችልም። የተመሰገነው ስለታረደ ነው። ራእይ 1፡6ን መመልከትም ይቻላል። እግዚያብሄርን ሲያመሰግኑት ግን ስለፈጣሪነቱ ነው። ራእይ 4፡11 ተመልከቱ።

ቆላ 1፡15-16 "እርሱ የማይታይ አምላክ አምሳል ነው።" የማይታይ አምላክ አምሳል መሆኑ አምላክ ነው ማለት አይደለም። አዳም በእግዚያብሄር አምሳል ነው የተፈጠረው። ሮሜ 8፡29 ላይ ክርስትያኖች የልጁን መልክ እንዲመስሉ ነው የተወሰኑት ይላል።
"የሚታዩትና የማይታዩት ሃይላት.....በሰማይና በምድር ያሉት ሁሉ በእርሱ ተፈጥረዋልና፡ ከፍጥረት ሁሉ በፊት በኩር ነው።" ይሄ ክፍል ኢየሱስ የእግዚያብሄር የአዲስ ፍጥረቱ መጀመሪያ እንደሆነ ያሳያል። ራእይ 3፡14ን ይመልከቱ። በኢየሱስ በኩልም አዲስ ፍጥረታትን፤ ስልጣናትን፤ አለቅነትን ፈጥሮአል። ኤፌ 1፡1-21 ይመልከቱ። ብዙ ጊዜ፡ ቆላ 1፡15-16 ላይ ኢየሱስ የብሉይ ኪዳን ፈጣሪ ተደርጎ ይወሰዳል። ጳውሎስ የሚያስተላልፈው መልእክት ግን፡ በአዲስ ኪዳን ከኢየሱስ ሞትና ትንሳኤ በኅላ ስለተገኘው አዲስ ፍጥረት ነው። ቆላ 1፡13 ጀምሮ ስለልጁ፡ ስለቤተክርስትያን፡ ለሞቱና ትንሳኤው ነው የሚያወራው። ጳውሎስ ተፈጠሩ ያላቸው ነገሮች አንዱም በዘፍ 1 ላይ አይገኝም። ጳውሎስ ኢየሱስን የውቅያኖስ፡ የተራራ፡ የወፎች፡ የክዋክብት.....ፈጣሪ ነው አላለም። ነገር ግን ስልጣናት፡ አለቅነት....በሰማይና በምድር ያሉት ሁሉ በእርሱ በኩል (በክርስቶስ በኩል) ተፈጠሩ ነው የሚለው። እነዚህም ኤፌ 1፡1-21 ላይ ተቀምጠዋል። 2ኛ ቆ 5፡17 ላይ "ማንም በክርስቶስ ቢሆን አዲስ ፍጥረት ነው።" ይላል። ከፍጥረት ሁሉ በፊት በኩር ማለትም፡ ክርስቶስ በወንድሞች (በአዲሱ ፍጥረት) መካከል በኩር ነው። ሮሜ 8፡29ን ይመልከቱ።

እስራኤል ሆይ ስማ፡ ጌታ አምላካችን አንድ ጌታ ነው። ይህ አንዱ አምላክ፡ እግዚያብሄር አብ ብቻ ነው። 1ኛ ቆሮ 8፡4-6 "ከአንዱ አምላክ በቀር ሌላ እንደሌለ እናውቃለን.......አንድ አምላክ አብ አለን።" አንባቢ ያስተውል። ስላሴ የሚባል አስተምህሮ መጽሃፍ ቅዱስ ፈጽሞ የማያውቀው፡ ከግሪኮች ፍልስፍና ላይ የተመረኮዘ ሰዎችን ከፈጣሪ የሚያርቅና ወደ ሞት የሚወስድ ውስብስብ አስተምህሮ ነው።
ክፍል አንድ

የጌታ ሰላም ይብዛልህ!

አየህ ከላይ መልሴ ላይ ለመግለጽ እንደሞከርኩት የስላሴ ትምህርት በአንድ ወገን የተለጠጠ እንደሆነና ሙሉውን ሚዛናዊ የመጽሐፍ ቅዱስ አስተምህሮት እንደማያንጸባርቅ ለማስረዳት ሞክሬአለሁ።

በተመሳሳይ መልኩም እንዳንተ አይነት አመለካከት ያላቸውና የኢየሱስን አምላካዊ ባሕርይ የማይቀበሉም እንዲሁ ወደ ሌላኛው ወገን የተለጠጡና ሚዛናዊውን የመጽሐፍ ቅዱስ ሃሳብ እንደማያንጸባርቁ ተናግሬአለሁ።

እናም በሁለቱም የማየው አንድ ችግር ምንድነው፤ መጽሐፍ ቅዱስ ላይ የተጻፉ አንዳንድ ክፍሎች ከእነርሱ አመለካከት ጋር ስለሚጋጩ እነዚያን ክፍሎች በማያረካና በማያሳምን መልኩ መሞረድና ማስተካከል ግድ ይሆንባቸዋል።

ሁለቱም በተቃራኒ ጫፍ ላይ ያሉ ትምህርቶች ሁል ጊዜም ሙሉ ያልሆኑ፣ ቀዳዳና ክፍተት አላቸው። ስለዚህም ሁሉንም የመጽሐፍ ቅዱስ ክፍሎች ለማጣጣም እጅግ ያስቸግራቸዋል፡፡ ስለዚህ የእኔ ምክር ምንድነው፤ እስቲ የስላሴንም ይሁን ኢየሱስ አምላክ አይደለም የሚለውን ትምህርት ሳንደግፍና defend ሳናደርግ እንዲሁም ምንም ሳንቀንስና ሳንጨምር ዝም ብለን መጽሐፍ ቅዱስ የሚለውን ሁሉ እንቀበል። ከፕሮቴስታንት ወይም ከጆቫ ወይም ከኦርቶዶክስ ሃይማኖታችን ጋ ቢጋጭም ይጋጭ ብለን ሙሉውን ቃሉን ለመቀበል እንሞክር። የአንዱ ትምህርት ቲቮዞና defender ከመሆን መንፈስ ወጥተን just መጽሐፍ ቅዱስ የሚለውን እንዳለ ለመቀብል እንሞክር።

አሁን ወደ አንተ ልመለስ ...

አንድ ምሳሌ ልስጥህ እንዴት አድርገህ ቃሉን የግድ መለወጥ እንዳስፈለገህ የሚያሳይ። ይህ አይነቱን የቃሉን መለወጥ ግን በአንተ ብቻ ሳይሆን በስላሴ አማኞችም ብዙ ጊዜ አያለሁ። በግድ አንዳንድ የመጽሐፍ ቅዱስ ክፍሎች ካልተለወጡ ከሁለቱም አመለካከቶች ጋ አይሄዱምና።

በዮሐንስ 1፡1-3 ላይ ያለውን "በመጀመሪያ ቃል ነበረ፤ ቃልም በእግዚያብሄር ዘንድ ነበረ፤ ቃልም እግዚያብሄር ነበረ።" የሚለውን ክፍል አንተ ስታስረዳ "ቃል እንጂ ኢየሱስ በአብ ዘንድ ነበረ አይልም። ይህ ቃል በ 1ኛ ዩሃ 1፡1-4 ላይ እንደተጠቀሰው የህይወት ቃል እንጂ የራሱ ማንነት ያለው አምላክ አይደለም" ነበር ያልከው፡፡

አየኸው ግን ምን መደምደሚያ ላይ እንደመጣህ? በግልጽ "ቃል እግዚአብሔር ወይም አምላክ ነበር" የሚለውን ክፍል አስረድተህ አብራርተህ በመጨረሻ ጭራሽ "ቃል አምላክ አልነበረም" ወደሚል ወደ ተቃራኒው መደምደሚያ ነው የመጣኸው። ይሄንን ነው እኔ እያልኩ ያለሁት።

ይህ ክፍል በቀጥታና በትክክል ከሚናገረው ማለትም ቃል አምላክ እንደነበረ ከሚለው ቀጥተኛ ሃሳብ ተነስተህ ቃል አምላክ አልነበረም ወደሚል መደምደሚያ ደረስክ። ለምን? ምክንያቱም ልክ እንደ ስላሴ አማኞች አንተም ከመሰረታዊ እምነትህ ጋር የሚጋጩ የተለያዩ ክፍሎችን በግድ መለወጥ አለብህና። ያለበለዚያ ማጣጣም በጣም ይከብዳል።

እኔ ግን ከብዙ ጊዜ የመጽሐፍ ቅዱስ ጥናት የተረዳሁት አንድ ነገር፤ ከብዙ የመጽሐፍ ቅዱስ ክፍሎች ጋር ለማጣጣም አንዳንድ የመጽሐፍ ቅዱስ ክፍሎችን መሸራረፍና መሞረድ የሚያስፈልገው ትምህርት ሚዛናዊ የመጽሐፍ ቅዱስ ትምህርት አይደለም።
ለዚህ ነው ኢየሱስ አምላክ አይደለም የሚሉም ይሁን የስላሴን ትምህርት የሚያምኑ ሁለቱም ብዙ ክፍሎችን መሞረድ ግድ የሚላቸው።

ይቀጥላል...
ክፍል ሁለት

እስቲ ስለ ኢየሱስ ከመወለዱ በፊት የነበረና የኖረ (pre-existent)እንደሆነ የሚያሳዩ ክፍሎችን እንመልከት። አሁንም ምንም ሳንሸራርፍና ሳንሞረድ እንዳለ ለመቀበል እንሞክር።
Quote:
የዮሐንስ ወንጌል 8
56 አባታችሁ አብርሃም ቀኔን ያይ ዘንድ ሐሤት አደረገ፥ አየም ደስም አለው።
57 አይሁድም፦ ገና አምሳ ዓመት ያልሆነህ አብርሃምን አይተሃልን? አሉት።
58 ኢየሱስም፦ እውነት እውነት እላችኋለሁ፥ አብርሃም ሳይወለድ እኔ አለሁ አላቸው።

የዮሐንስ ወንጌል 17
5 አሁንም፥ አባት ሆይ፥ ዓለም ሳይፈጠር በአንተ ዘንድ በነበረኝ ክብር አንተ በራስህ ዘንድ አክብረኝ።

እነዚህ ከላይ ያሉት ሁለት ክፍሎች ምንም ሳንጨምር ሳንቀንስ ኢየሱስ ከአብርሃም በፊት ብቻ ሳይሆን ዓለም ሳይፈጠርም በፊት የነበረ እንደሆነ ግልጽ ያደርጋሉ።

ከዚህም በተጨማሪ በራእይ መጽሐፍ ላይ ስንመለከት የኢየሱስ አንዱ ስሙ "የእግዚአብሔር ቃል" እንደሆነ ተጽፎአል።
Quote:
የዮሐንስ ራእይ 19
11 ሰማይም ተከፍቶ አየሁ፥ እነሆም አምባላይ ፈረስ፥ የተቀመጠበትም የታመነና እውነተኛ ይባላል፥ በጽድቅም ይፈርዳል ይዋጋልም
12 ዓይኖቹም እንደ እሳት ነበልባል ናቸው፥ በራሱ ላይም ብዙ ዘውዶች አሉ፥ ከእርሱም በቀር አንድ እንኳ የማያውቀው የተጻፈ ስም አለው፤
13 በደምም የተረጨ ልብስ ተጐናጽፎአል፥ ስሙም የእግዚአብሔር ቃል ተብሎአል።
14 በሰማይም ያሉት ጭፍራዎች ነጭና ጥሩ ቀጭን የተልባ እግር ልብስ ለብሰው በአምባላዮች ፈረሶች ተቀምጠው ይከተሉት ነበር።
15 አሕዛብንም ይመታበት ዘንድ ስለታም ሰይፍ ከአፉ ይወጣል፤ እርሱም በብረት በትር ይገዛቸዋል፤ እርሱም ሁሉን የሚገዛ የእግዚአብሔርን የብርቱ ቍጣውን ወይን መጥመቂያ ይረግጣል።
16 በልብሱና በጭኑም የተጻፈበት። የነገሥታት ንጉሥና የጌታዎች ጌታ የሚል ስም አለው።

ከላይ እንደምንመለከተው ኢየሱስ በቁጥር 16 ላይ "የነገሥታት ንጉሥና የጌታዎች ጌታ" ተብሎ ሲጠራ በቁጥር 13 ላይ ደግሞ "የእግዚአብሔር ቃል" ተብሏል።

ስለዚህ መጽሐፍ ቅዱስ ራሱ መጽሐፍ ቅዱስን ይተርጉም ካልን። በዮሐንስ 1 ላይ ያሉት የሚከተሉት ክፍሎች ያለማወላወል ስለ ኢየሱስ እንደሚናገሩ እንገነዘባለን።
Quote:
የዮሐንስ ወንጌል 1
1 በመጀመሪያው ቃል ነበረ፥ ቃልም በእግዚአብሔር ዘንድ ነበረ፥ ቃልም እግዚአብሔር (አምላክ) ነበረ።
2 ይህ በመጀመሪያው በእግዚአብሔር ዘንድ ነበረ።
3 ሁሉ በእርሱ ሆነ፥ ከሆነውም አንዳች ስንኳ ያለ እርሱ አልሆነም።
...
14 ቃልም ሥጋ ሆነ፤ ጸጋንና እውነትንም ተመልቶ በእኛ አደረ፥ አንድ ልጅም ከአባቱ ዘንድ እንዳለው ክብር የሆነው ክብሩን አየን።

ክፍሉን በቀጥታ እንግዲህ ስናነብበው የሚሰጠን መልእክት ኢየሱስ እንደማናቸውም ነብይ ወይም የእግዚአብሔር መልእክተኛ ልክ ሲወለድ አይደለም ታሪኩ የጀመረው። ስሙ "የእግዚአብሔር ቃል" የተባለው ኢየሱስ ዓለም ሳይፈጠር በፊት በእግዚአብሔር ዘንድ ነበረ። እርሱም አንድያ ወይም unique የሆነ የአንዱ አምላክ ልጅ ብቻም ሳይሆን ራሱም አምላክ ነበረ፤ ነው እያለን ያለው።

ይህ ለአንዳንዶች ሊከብደን የሚችል ሃሳብ እንደሆነ እገነዘባለሁ፤ ነገር ግን በደንብ መጽሐፍ ቅዱስን ስናጠና ምንም እንኳን ሌሎችም አምላክ የተበሉ ቢኖሩም እንዲሁም መላእክትም ይሁኑ እኛም የክርስቶስ ተከታዮች "የእግዚአብሔር ልጆች" ተብለን የተጠራን ቢሆንም፤ መጽሐፍ ቅዱስ ስለ ኢየሱስ ልጅነትና አምላክነት ሲናገር ግን፤ unique በሆነ ሁኔታ ወይም በተለየ ሁኔታ ብቸኛና አንድያ የእግዚአብሔር ልጅ እንደሆነ ነው የሚናገረው። ምስጢሩ ያለው እዚህ ላይ ነው።

የእግዚአሔር ብቸኛና አንድያ ልጅም መሆኑም ነው "አንድያ ልጁን እስኪሰጥ ድረስ ዓለምን ወደደ" የሚለውና እንዲሁም "ለገዛ ልጁ ያልራራለት" የሚሉት የእግዚአብሔርን ፍቅር የሚያሳዩ ትርጉም የሚኖራቸው። በእርግጥ የኢየሱስ ልጅነት የተለየና ብቸኛ ልጅነት ባይሆንና እንደኛ ወይም እንደ መላእክት እንዲያው "የእግዚአብሔር ልጅ" ብቻ ተብሎ የተጠራ አንድ ፍጡር ብቻ ቢሆን ኖሮ እነዚህ ክፍሎች ምንም ትርጉም አይሰጡም።
Quote:
የዮሐንስ ወንጌል
3፥16 በእርሱ የሚያምን ሁሉ የዘላለም ሕይወት እንዲኖረው እንጂ እንዳይጠፋ እግዚአብሔር አንድያ ልጁን እስኪሰጥ ድረስ ዓለሙን እንዲሁ ወዶአልና።

ወደ ሮሜ ሰዎች
8፥32 ለገዛ ልጁ ያልራራለት ነገር ግን ስለ ሁላችን አሳልፎ የሰጠው ያው ከእርሱ ጋር ደግሞ ሁሉን ነገር እንዲያው እንዴት አይሰጠንም?

አምላክ ወይም የእግዚአብሔር ልጅ የተባሉ ሰዎችም ይሁኑ መላእክቶች በመጽሐፍ ቅዱስ አሉ። ሆኖም መጽሐፍ ቅዱስ የኢየሱስን ግን የተለየ እንደሆነ ነው የሚያስተምረው። የእርሱ አምላክነት፤ ተብሎ ከመጠራት ያለፈ ከዘር ምድብ ወይም Species ጋር የተያያዘ ነው። ልክ አምበሳ፣ ዝሆን፣ ፈረስ ወዘተ ከእንስሳት እንደሚመደቡ፤ ጥቁር ሰው፣ ነጭ፣ ሴት፣ ወንድ፣ ሕጻን ወዘተ ከሰው ዘር እንደሚመደቡ፤ መላእክት፣ ሱራፌልና ኪሩቤል ከመላእክት ወገን እንደሚመደቡ እርሱ ብቻውን የእግዚአብሔር ወገን ወይም ዘር ነው። ኢየሱስ ብቻ ነው ከመላእክትም ይሁን ከሰው ወይም ከሌላ ብቻ ሊመደብ የማይችለው። አንድያና ልዩ ቀጥተኛ የእግዚአብሔር ልጅና ዘር ስለሆነ ከአምላክ የዘር ምድብ ወይም ወገን ነው የሚመደበው። ይሄ ነው እንግዲህ ምስጢሩ።

ይህንን የኢየሱስን uniqness ወይም ኢየሱስ ያለውን ልዩ የሆነ ማንነት ከተረዳነው ነው ብዙ የመጽሐፍ ቅዱስ ክፍሎ በጣም በቀላሉ ግልጽ የሚሆኑልን።

ለምሳሌ በእብራውያን 1፡8-9 ላይ " አምላክ ሆይ ዙፋንህ እስከዘላለም ድረስ ጸንቶ ይኖራል.....ስለዚህ እግዚያብሄር አምላክህ ከባልንጀሮችህ በላይ በደስታ ዘይት ቀባህ.." የሚለውን ለመረዳት ምንም አይከብድም። ኢየሱስ አምላክ ያለው አምላክ ነውና።

በራእይ መጽሐፍም እንደምንመለከተው የአንዱ የእግዚአብሔር የዘር ምድብ ስላለው ነው፤ ልክ እንደ እግዚአብሔር ምስጋናና አምልኮ የሚቀበለው፤ ልክ እንደ እግዚአብሔር መላእክቱን መላክ የሚችለው ወዘተ። ይሄ ነው በአምላክ ክብር ወይም መልክ መኖር ማለት። ማንም ፍጥረት መልካም ስለሠራ ብቻ ከእግዚአብሔር ጎን ለጎን ምስጋናና አምልኮ አይቀበልም። ብዙዎች ነብያት ታርደዋል ብዙ ዋጋም ከፍለዋል። ሁሉም ግን ከመላእክት ጋር ተደምረው እግዚአብሔርንና ኢየሱስን አምላኪዎች ናቸው እንጂ ከእግዚአብሔር ጋ አብረው ምስጋንና ውዳሴን አይቀበሉም።

በፊልጵስዩስም የእግዚአብሔርን መልክና የባሪያን መልክ የሚያወዳድረው፤ አንተ እንዳልከው እግዚአብሔርን ስለመመስል ማለትም ስለ ባሕርይ የሚናገር ክፍል አይደለም፡፡ ነገር ግን ስለ statusና ስለ ክብር ነው የሚያወራው። በአምላክ ደረጃ እየተመለከና መላእክትን እያዘዘ ወዘተ በከፍተኛ የክብር ቦታ ይኖር የነበረ፤ ነገር ግን ራሱን አዋርዶ የመጨረሻ የታችናውን statusና የተዋረደውን የባሪያን መልክ ያዘ ነው የሚለው ቃሉ። እንጂ እግዚአብሔርን ስለመምሰል አይደለም የሚያወራው።
Quote:
ወደ ፊልጵስዩስ ሰዎች
2፥6 እርሱ በእግዚአብሔር መልክ ሲኖር ሳለ ከእግዚአብሔር ጋር መተካከልን መቀማት እንደሚገባ ነገር አልቈጠረውም፥

ይህ ብቻ አይደለም ብዙ አይሁዶችም መሲሁ የዳዊት ልጅና የእሥራኤል ንጉሥ ብቻ እንደነበር እንጂ ከዚያ በላይ እንደሆነ አድርገው ያዩት ስላልነበረ ኢየሱስ ይህንን አስተሳሰባቸውን ቻሌንጅ ሲያደርግ እንዲህ ነበር ያላቸው።
Quote:
የማርቆስ ወንጌል 12
35 ኢየሱስም በመቅደስ ሲያስተምር መልሶ እንዲህ አለ፦ ጻፎች ክርስቶስ የዳዊት ልጅ ነው እንዴት ይላሉ?
36 ዳዊት ራሱ በመንፈስ ቅዱስ፦ ጌታ ጌታዬን፦ ጠላቶችህን የእግርህ መረገጫ እስካደርግልህ ድረስ በቀኜ ተቀመጥ አለው አለ።
37 ዳዊትም ራሱ ጌታ አለው፤ እንዴትስ ልጁ ይሆናል? ብዙ ሕዝብም በደስታ ይሰሙት ነበር።

ይህ ከላይ ኢየሱስ የጠቀሰው ክፍል የሚገኘው በመዝሙረ ዳዊት 110 ላይ ነው። እዛ ክፍል ላይ በእብራይስጡ የሚናገረው እግዚአብሔር(ያሕዌ) ጌታዬን(አዶናይን) እንዲህ አለው ብሎ ነው ዳዊት የሚጽፈው። ዳዊት አዶናይ ብሎ ለሚጠራው ለክርስቶስ/ለመሲሑ እግዚአብሔር(ያሕዌ) የተናገረውን ቃል ነው ዳዊት የሚጽፈው።

ይህን ክፍል ነው እንግዲህ ኢየሱስ ጠቅሶ መሲሑ የዳዊት ልጅ ብቻ ነው የሚለውን አስተሳሰብ ቻሌንጅ ያደረገው። ዳዊት መሲሁን አዶናይ ብሎ የሚጠራው ከሆነ፤ እንግዲያስ ከዳዊት ልጅም በላይ ነው እያላቸው ነው። ይህ ነው በመጽሐፍ ቅዱስ ያለው የክርስቶስ ሚስጥር፤ ከያሕዌ ጋር ይኖር የነበረ አዶናይ ጌታ።

እስቲ ራስህን ተመልከተው እንዴት አድርገህ ቃሉን ለመሞረድ እንደተገደድህ አየተኸዋል? Because it doesn't fit with your doctrine. በእብራውያን 1፡8-9 ላይ ስላለው ስትናገር "ኢየሱስ አምላክ ተብሎ ቢጠራም፡ የራሱ የሆነ አምላክ እንዳለው ይህ ክልፍ ያሳያል። አምላክ ያለው አምላክ ምን ሊሆን እንደሚችል መረዳት ቀላል ነው።" ብለሃል።

Just ይሄንን ነው እኔ እያልኩ ያለሁት። ምን ይሁን ምን ክፍሉ ኢየሱስን አምላክ ያለው አምላክ አድርጎ ነው የሚያቀርበው። So, እንዳለ እንዲሁ ነው መቀበል ያለብን። ለመረዳት ይከብድ ይሆናል ነገር ግን ያላለውን፤ እንዲህ ሲል እንዲህ ማለቱ ነው እያልን ቃልን መለወጥ የለብንም።

ለማጠቃለል

የኢየሱስ የአምላክነት መሠረቱ የዘር ምድቡ ወይም Species ነው። እርሱ ብቻ ነው ከመላእክት ጋር ሳይሆን ልዩ በሆነ ሁኔታ ከእግዚአብሔር ጋር የዘር ምድብ ያለው ብቸኛና አንድያ የእግዚአብሔር ልጅ።

ልክ በአባቱ ማለትም በአምላክ ክብር የሚኖር እንደ አምላክም ምስጋናን የሚቀበል፤ በፍጥረት ላይ የተሳተፈ ማለትም ሁሉ በእርሱ የተፈጠሩ፤ መላእክቱን የሚያዝዝ ልዩ የእግዚአብሔር ልጅ ነው።

"አንድያ ልጁን እስኪሰጥ አለምን ወደደ" የሚለውም ይሁን "ለገዛ ልጁ ያልራራለት" የሚለው ክፍል ትርጉም የሚኖረውና የሚያስደንቀውም ለዚህ ነው። ከእግዚአብሔር የዘር ምድብ የሚመደብ ብቸኛውን የራሱን ልጅ ነው ለመስቀል ሞት የሰጠን እንጂ ከፍጥረቱ አንዱን ወይም ከመላእክት ወይም ከሰው አንዱን ብቻ ቢሰጠን ኖሮ ምንም አይስደንቅም ነበር።

ይህ ሁሉ ሆኖም ቢሆን ግን ከላይ በመልሴ ላይ እንዳልኩት፤ ኢየሱስን ከተሰጠው ስፍራ ያለ ልክ በመለጠጠ ከአብ እኩል የሚያደርገው የስላሴ ትምህርትም ግን ሚዛናዊ እንዳልሆነ አሁንም ለመድገም እወዳለሁ።

ከመመለስህ በፊት እባክህን ትንሽ እንድታስብበትና አንዳንድ ጥቅሶችን ብቻ ሳይሆን ሙሉውን ስዕል (full picture) ለማየትና በዛም ላይ ለማሰላሰል ሞክር። እኔ የስላሴ ትምህርትም ይሁን ኢየሱስ አምላክ አይደለም የሚለው ትምህርት ደጋፊ አይደለሁም። ከሃይማኖታዊ ኮተትና ቲቮዞነት ነጻ በሆነ አዕምሮ ግን ሙሉውንና ሚዛናዊውን የመጽሐፍ ቅዱስ ትምህርት ለመቀበል እጥራለሁ። ስለዚህ እኔን ለማሳመን ሳይሆን ጊዜ ውሰድና ነጻ በሆነ አዕምሮ ቃሉ ላይ ሳትጨምር ሳትቀንስ ሊናገር የሚፈልገውን እንደፈለገ እንዲናገር እየፈቀድክለት እንደገና እንድታነብበው እለምንሃለሁ።
Quote:
ወደ ዕብራውያን 1
1 ከጥንት ጀምሮ እግዚአብሔር በብዙ ዓይነትና በብዙ ጎዳና ለአባቶቻችን በነቢያት ተናግሮ፥
2 ሁሉን ወራሽ ባደረገው ደግሞም ዓለማትን በፈጠረበት በልጁ በዚህ ዘመን መጨረሻ ለእኛ ተናገረን፤
3 እርሱም የክብሩ መንጸባረቅና የባሕርዩ ምሳሌ ሆኖ፥ ሁሉን በስልጣኑ ቃል እየደገፈ፥ ኃጢአታችንን በራሱ ካነጻ በኋላ በሰማያት በግርማው ቀኝ ተቀመጠ


እግዚአብሔር ይባርክህ!
ሰላም ወገኔ። አሁንም ስለቀናው መልስ አክብሮቴ ይድረስልኝ። ወደ ነጥቡ ስመጣ፤ ዩሃ 1፡1-3 ከ 1ኛ ዩሃ 1፡1-5 ጋር ፈጽሞ አንድ ሃሳብ መሆኑን መረዳት አስቸጋሪ አይሆንም። በመጽሃፍ ቅዱስ ውስጥ አንዳንድ ቃላት እጅግ አስቸጋሪዎች መሆናቸው አይካድም። እናም ቃልም አምላክ ነበር ማለት ቃል ፍጹም አምላክን የሚገልጥ መሆኑን ለመናገር እንጂ፡ ቃል የሚባል አምላክ በአምላክ ዘንድ አለ የሚል የአይሁድ ትምህርት የለም። ሃዋርያቶች ጽሁፎቻቸውን ሲጽፉ መሰረታቸው ብሉይ ኪዳንና የጌታ ኢየሱስ ትምህርት መሆኑ ግልጽ ነው። ብሉይ ኪዳን ስለ አንዱና ብቸኛው አምላክ ነው የሚናገረው። "ስማ እስራኤል ጌታ አምላካችን አንድ ጌታ ነው"" ዘዳ 6፡4. ቃል ማለትም በብሉይ ኪዳን የእግዚያብሄርን ቃል ነው የሚያመለክተው። ዩሃ 1፡1-3 ላይ ያሉት ቃላት በሙሉ 1ኛ ዩሃ 1፡1-5 ላይ ተጠቅሰዋል። እናም መጽሃፍ ቅዱስን በመጽሃፍ ቅዱስ ብቻ ነው የምንፈታው። ለምሳሌ ምሳሌ 8፡30 ላይ ጥበብ ዋና ሰራተኛ ነበርኩ ትላለች። ይህንን ይዘን፡ ጥበብ የምትባል ሴት ፍጥረት በእግዚያብሄር አጠገብ ሆና ፍጥረትን ታግዝ ነበር አንልም። ሰውኛ አነጋገር መሆኑን እንረዳለን እንጂ። በተለይ ምሳሌ 8ን ከኢዩብ 28፡12-28 ጋር በማስተያየት መረዳት ይቻላል። ምክንያቱም አንዳንድ ሰዎች ምሳሌ 8 ላይ ያለችው ጥበብ የምትባለው፡ ኢየሱስ ነው ይላሉ። ዩሃንስ 1፡1-3 ቃልን በሰውኛ አገላለጽ ነው ያስቀመጠው። ይህንንም ራሱ ዩሃንስ በ 1ኛ ዩሃንስ 1፡1-5 ላይ አስቀምጦታል። በተጨማሪ ራእይ ዩሃንስ 19፡13 ላይ የኢየሱስ ስም "የእግዚያብሄር ቃል ተብሎአል" ይላል እንጂ፡ የእግዚያብሄር ቃል ነበረ አይልም።

ዩሃንስ 8፡58 ላይ "ከአብርሃም በፊት እኔ ነኝ" አለ እንጂ እኔ ነበርኩ አላለም። እዚህ ክፍል ላይ ጌታ ኢየሱስ "አብርሃም ቀኔን ያይ ዘንድ ወደደ አየም ደስም አለው" ይላል። እንግዲህ እንዴት ነው አብርሃም የኢየሱስን ቀን ያይ ዘንድ የወደደውና ያየው? መቼ ነው አብርሃም መሲሁን ያየው? በእምነት ወይስ በተግባር? አብርሃም ቀኔን ያይ ዘንድ ወደደ አየም ደስም አለው? ይሄ አብርሃም በእምነት የመሲሁን መምጣት ማየቱን እንጂ፡ አብርሃም መሲሁን በብሉይ ኪዳን አየው ማለት አይደለም። እግዚያብሄር ለአብርሃም ወንጌልን በብሉይ ኪዳን ሰበከለት ይላል ቃሉ። ገላትያ 3፡8ን ተመልከት። ከዚህ አንጻር ነው ጌታ ኢየሱስ ከአብርሃም በፊት እኔ ነኝ ያለው። ለአብርሃም ወንጌል ሲሰበክለት፡ መሲሁ በእግዚያብሄር እቅድ ውስጥ መኖር ነበረበት። 1ኛ ጴጥ 1፡20-21 ላይ"አለም ሳይፈጠር እንኳ አስቀድሞ ታወቀ" ይላል።

እብ 1፡8 ላይ ጌታ ኢየሱስ አምላክ ተብሎ ቢጠራም፡ ቁ 9 ላይ እግዚያብሄር ራሱ አምላኩ እንደሆነ ይናገራል።

ሰላም ሁንልኝ!
የጌታ ሰላም ይብዛልህ!

አይዞህ እኔ ሰዎች ጥያቄን ስለጠየቁ ወይም ከእኔ የተለየ አመለካከት ስላላቸው አልራገምም ወይም አልሳደብም :) ይሄንን ሰዎች በሃይማኖታቸው ላይ እንጂ በማይነቃነቀው ዓለት በክርስቶስ ላይ ካልቆሙ፤ መሠረታቸው ሲናጋ የሚያደርጉ ነው። ስለዚህ ኦርቶዶክስም፣ ጆቫም፣ ፕሮቴስታንትም፣ ባሂም፣ እስላምም፣ ሞርሞንም ወዘተ አመለካከት ይኑርህ ክርስቶስ ለአንተም ለእኔም ነውና የተሰዋው፤ ለመማማር እስከፈቀድክ ድረስ በአክብሮት መወያየት እንችላለን።

ይኸውልህ እንዳልኩህ አንተ በግልጽ የተጻፉትን ብዙ የመጽሐፍ ቅዱስ ክፍሎች ምን ያህል መሞረድ እንዳስፈለገህ ግን እያየኸው ነው? ምን ያህል የተጻፉትን እንዳሉ ለመቀበል እንዳቃተህ ግን አየኸው።

ለምሳሌ ተመልከት ዕብራውያን 1 ላይ ግልጽ በሆነ ሁኔታ እግዚአብሔር ዓለማትን የፈጠረው በልጁ እንደሆነ ተጽፎአል፦
Quote:
ወደ ዕብራውያን 1
1 ከጥንት ጀምሮ እግዚአብሔር በብዙ ዓይነትና በብዙ ጎዳና ለአባቶቻችን በነቢያት ተናግሮ፥
2 ሁሉን ወራሽ ባደረገው ደግሞም ዓለማትን በፈጠረበት በልጁ በዚህ ዘመን መጨረሻ ለእኛ ተናገረን፤
3 እርሱም የክብሩ መንጸባረቅና የባሕርዩ ምሳሌ ሆኖ፥ ሁሉን በስልጣኑ ቃል እየደገፈ፥ ኃጢአታችንን በራሱ ካነጻ በኋላ በሰማያት በግርማው ቀኝ ተቀመጠ

ይህ ደግሞ ዮሐንስ 1 ላይ ካለውም ይሁን ቆላስዬስ ላይ ካለው እግዚአብሔር ሁሉን በክርስቶስ እንደፈጠረ ከሚናገሩት ክፍሎች ጋር የሚስማማ አንድ ሃሳብ ነው።

ኢየሱስ ራሱ ሲጸልይ "ዓለም ሳይፈጠር በፊት በአንተ ዘንድ በነበረኝ ክብር አክብረኝ" ያለውንም ሁሉ መቀበል አልፈለግህም። አየህ ማንም በቅን ልብ አንብቦ እንዳሉ ሊቀበላቸው የሚገባውና ምንም ያልተወሳሰቡ ጥቅሶች ሁሉ በግድ መለወጥ እንዳስፈለገህ እያየኸው ነው።

ይህ ጉዳይ ነው እኔንም የስላሴ ትምህርት ላይ ጥያቄ እንድጠይቅ ያደረገኝ፤ አንተም ብዙ መጣፍና መሞረድ እንዳበዛህ እይና እንደገና እምነትህን መርምር።

ስለ ጥበብ ያልከው በእርግጥ ምሳሌ 8 ላይ በአማርኛው አንቺ ተብላ የተጠራችው ጥበብ ክርስቶስ እንደሆነ በትክክል የተጻፈ ነገር የለም። ሆኖም ግን እዚያ ክፍል ላይ የሚያወራው ዝም ብሎ ስለ ሰው ጥበብ ሳይሆን ዓለማትን ስለፈጠረበት ስለ እግዚአብሔር ጥበብ ነው። በአዲስ ኪዳን ደግሞ የእግዚአብሔር ጥበብ ክርስቶስ እንደሆነ ተጽፎአል። ቢያንስ ቢያንስ ያ ምሳሌ ላይ የተጻፍው ጥበብ ወደ ክርስቶስ ያመለክታል ማለት ግን እንችላለን።

ምክንያቱም መጽሐፍ ቅዱስ ሲናገር የእግዚአብሔር ጥበብ ራሱ ክርስቶስ ነው ይላል። ደግሞም ክርስቶስ ለአይሁዳውያን ሲነግራቸው የብሉይ መጽሐፍት የሚናገሩት ስለ እኔ ነው ብሏል። Of course ሁሉ ጥበብ ተብሎ የተጻፈው ቦታ ሁሉ ክርስቶስ ነው ማለት አይደለም ሆኖም ግን የእግዚአብሔር ጥበብ ግን ክርስቶስ ነው።
Quote:
ኛ ወደ ቆሮንቶስ ሰዎች 1
22 መቼም አይሁድ ምልክትን ይለምናሉ የግሪክ ሰዎችም ጥበብን ይሻሉ፥
23 እኛ ግን የተሰቀለውን ክርስቶስን እንሰብካለን፤ ይህም ለአይሁድ ማሰናከያ ለአሕዛብም ሞኝነት ነው፥
24 ለተጠሩት ግን፥ አይሁድ ቢሆኑ የግሪክ ሰዎችም ቢሆኑ፥ የእግዚአብሔር ኃይልና የእግዚአብሔር ጥበብ የሆነው ክርስቶስ ነው

የዮሐንስ ወንጌል 5
39 እናንተ በመጻሕፍት የዘላለም ሕይወት እንዳላችሁ ይመስላችኋልና እነርሱን ትመረምራላችሁ፤ እነርሱም ስለ እኔ የሚመሰክሩ ናቸው
40 ነገር ግን ሕይወት እንዲሆንላችሁ ወደ እኔ ልትመጡ አትወዱም።

ጥበብ ማለት እኮ ልክ ጥበበኛው ንጉስ ሰለሞን ለመፍረድ አስቸጋሪ የሆነ የተቆላለፈ የሁለቱ ሴትቶች ፍርድ ሲመጣለት በጥበቡ መፍትሔ እንደሰጠ፤ ጥበብም ለተቆለፉና ሊሠሩ ለማይችሉ ነገሮች መፍትሔ የምትሰጥ ናት።

እግዚአብሔር በብሉይም ይሁን በአዲስ ኪዳን መፍትሔ የሚሰጠው በራሱ ጥበብ ማለትም በክርስቶስ ነው። ለምሳሌ በብሉይ ኪዳን እስራኤላውያን ውሃ በጠማቸው ጊዜ እግዚአብሔር ሙሴን ዓለቱን ምታና ውሃ እንዲሰጥ አድርግ ብሎ ከተመታው ዓለት ውሃን ሰጣቸው። በአዲስ ኪዳን ስለዚህ ጉዳይ ሲናገር ያ የተመታው ዓለት ክርስቶስ ነው ያላል፦
Quote:
1ኛ ወደ ቆሮንቶስ ሰዎች 10
1 ወንድሞች ሆይ፥ ይህን ታውቁ ዘንድ እወዳለሁ። አባቶቻችን ሁሉ ከደመና በታች ነበሩ ሁሉም በባሕር መካከል ተሻገሩ፤
2 ሁሉም ሙሴን ይተባበሩ ዘንድ በደመናና በባሕር ተጠመቁ፤
3 ሁሉም ያን መንፈሳዊ መብል በሉ ሁሉም ያን መንፈሳዊ መጠጥ ጠጡ፤
4 ይከተላቸው ከነበረው ከመንፈሳዊ ዓለት ጠጥተዋልና፥ ያም ዓለት ክርስቶስ ነበረ

የእግዚአብሔር ጥበብ ማለት ይሄ ነው። ችግር ሲመጣ ሰዎች ያንን ችግር ለመፍታት መፍትሔና ጥበብ ሲያጡ፤ እግዚአብሔር በጥበቡ ማለትም በክርስቶስ መፍትሔ ይሰጣቸዋል።

ይህን ዓለት የክርስቶስ ምሳሌ ስለሆነና ክርስቶስ ደግሞ አንዴ ብቻ የሚመታ እንጂ ሙሴ እንዳደረገው ሁለቴ ስለማይመታ ነው፤ ሙሴ ወደ ተስፋዪቱ ምድር እንዳይገባ እግዚአብሔር የከለከለውና የጨከነበት። ምክንያቱም በመጀመሪያው ጊዜ ሙሴ ዓለቱን መታ በሁለተኛው ግን እግዚአብሔር ዓለቱን ተናገረው ብሎት ሳለ፤ ሙሴ ግን ዓለቱን ለሁለተኛ ጊዜ መታ በዚህ ምክንያት ሙሴ የተስፋዪቱን ምድር እንዳያይ እግዚአብሔር ከለከለው፤ ጨከነበትም። ዓለቱ የክርስቶስ ምሳሌ ነውና፤ ክርስቶስ አንዴ እንጂ ሁለቴ አይመታምና።

እስራኤላውያን በራባቸውም ጊዜ ቢሆን እግዚአብሔር የሰጣቸው መና ነው። ያም መና ወደ ክርስቶስ የሚያመለክት ነው። እውነተኛ ከሰማይ የወረደ የሕይወት እንጀራ ክርስቶስ ነውና።
Quote:
የዮሐንስ ወንጌል 6
30 እንግዲህ፦ እንኪያ አይተን እንድናምንህ አንተ ምን ምልክት ታደርጋለህ? ምንስ ትሠራለህ?
31 ይበሉ ዘንድ ከሰማይ እንጀራ ሰጣቸው ተብሎ እንደ ተጻፈ አባቶቻችን በምድረ በዳ መና በሉ አሉት።
32 ኢየሱስም፦ እውነት እውነት እላችኋለሁ፥ እውነተኛ እንጀራ ከሰማይ የሚሰጣችሁ አባቴ ነው እንጂ ከሰማይ እንጀራ የሰጣችሁ ሙሴ አይደለም፤
33 የእግዚአብሔር እንጀራ ከሰማይ የሚወርድ ለዓለምም ሕይወትን የሚሰጥ ነውና አላቸው።
34 ስለዚህ፦ ጌታ ሆይ፥ ይህን እንጀራ ዘወትር ስጠን አሉት።
35 ኢየሱስም እንዲህ አላቸው፦ የሕይወት እንጀራ እኔ ነኝ፤ ወደ እኔ የሚመጣ ከቶ አይራብም በእኔ የሚያምንም ሁልጊዜ ከቶ አይጠማም።
...
51 ከሰማይ የወረደ ሕያው እንጀራ እኔ ነኝ፤ ሰው ከዚህ እንጀራ ቢበላ ለዘላለም ይኖራል፤ እኔም ስለ ዓለም ሕይወት የምሰጠው እንጀራ ሥጋዬ ነው።

በብሉይ ኪዳን ከሞት መቅሰፍት እስራኤላውያንን ያዳናቸውን የታረደውን የፋሲካውን በግ ብንመለከት ወይም በምድረ በዳ እባብ በነደፋቸው ጊዜ ፈውስ የሆናቸውን በናስ ተሰርቶ የተሰቀለውን እባብ ብንመለከት ወዘተ ሁሉም ወደ ክርስቶስ የሚያሳዩ ናቸው። ማለትም እግዚአብሔር ለሁሉም መፍትሔና ጥበብ አድርጎ ለብሉይ ኪዳን ያሳያቸው ክርስቶስን ነው።
Quote:
የዮሐንስ ወንጌል 3
14-15 ሙሴም በምድረ በዳ እባብን እንደ ሰቀለ እንዲሁ በእርሱ የሚያምን ሁሉ የዘላለም ሕይወት እንዲኖረው እንጂ እንዳይጠፋ የሰው ልጅ ይሰቀል ይገባዋል

1ኛ ወደ ቆሮንቶስ ሰዎች
5፥7 እንግዲህ ያለ እርሾ እንዳላችሁ አዲሱን ሊጥ ትሆኑ ዘንድ አሮጌውን እርሾ አስወግዱ። ፋሲካችን ክርስቶስ ታርዶአልና

በአዲስ ኪዳንም ትልቅ ለሆነው ለሰው ልጆች ችግር እግዚአብሔር የሰጠው መፍትሔ ክርስቶስን ነው። ምክያቱም እግዚአብሔር የሚሠራውና ለእንቆቅልሾችም መፍትሔ የሚሰጠው በጥበቡ ማለትም በክርስቶስ ነውና።

እስቲ ስለ ክርስቶስ ደግሞ የበለጠ በዚህ ድረገጽ ላይ ያለውን "በእርሱ አምን ዘንድ ማነው?" የሚለውን ጽሑፍ እንድታነብብ እጋብዝሃለሁ!

......

ቃል አምላክ ነው ወደሚለው ስንመጣ ግን አንተ የሰጠኸውና ብዙዎችም የጆቫ እምነት ተከታዮች የሚሰጡት መልስ ማለትም ዮሐንስ 1ን ከምሳሌ 8 ጋር ለማነጻጻር መሞከር የሚያስኬድ አይደለም እላለሁ። ምክንያቱም በምሳሌ 8 ላይ ያ ጥበብ ማን እንደሆነ በግልጽ አልተጻፈም፤ በዮሐንስ 1 ላይ እኮ በግልጽ ቁጥር 14 "ቃልም ሥጋ ሆነ፤ ጸጋንና እውነትንም ተመልቶ በእኛ አደረ፥ አንድ ልጅም ከአባቱ ዘንድ እንዳለው ክብር የሆነው ክብሩን አየን" ብሎ ያ በቁጥር 1 ላይ ቃል ብሎ ዮሐንስ የጻፈው ማን እንደሆነ እኮ ይፈታዋል። ያ ቃል ራሱ ሥጋ የሆነውና አንድያ የእግዚአብሔር ልጅ የሆነው ኢየሱስ ክርስቶስ ነው ብሎ ፈትቶታል።

ራሱ ክፍሉ ስለዚያ ቃል ማንነት ነግሮን እያለ ለምንድነው ቃል ኢየሱስ አይደለም ወዘተ እያልን በግድ ሌላ ነገር ውስጥ የምንገባው? የዮሐንስ ወንጌል እኮ ወንጌል ነው። ማለትም እንደ ሌሎቹ ወንጌላት ሁሉ ሊናገርና ሊተርክ የሚፈልገው ስለ ኢየሱስ ክርስቶስ ነው እንጂ ስለ ሌላ ቃል ስለሚባል የሆነ ነገር አይደለም።

መጽሐፍ ቅዱስ ራሱን በዚያው ክፍል ከገለጸና ካስረዳ ከዚህ በተጨማሪ አይደለም ቃል ሲል ስለ ኢየሱስ አይደለም ሌላ ነገር ነው ምናምን ማለቱ የእውነትንና ቅንን መንገድ ለማግኘት የሚያዛልቅ አካሄድ አልመሰለኝም። በቅድሚያ ራሱ መጽሐፍ ቅዱሱ ሊል የፈለገውን ሳንጨምር ሳንቀንስ መቀበል ነው ያለብን። ያ ነው ወዳላወቅነውና ከዚህ በፊት ወዳላሰብነው ወደ እውነተኛው መረዳት የሚመራን።

......

ኢየሱስ ከአብርሃም በፊት ስለመኖሩም ስንመጣ፤ ከአብርሃም በፊት ስለመኖሩ ኢየሱስ የመለሰላቸው እኮ "ሃምሳ አመት ያልሞላህ አብርሃምን አይተኸዋልን?" ብለው ለጠየቁት ጥያቄ ነው። አዎ ከአብርሃም በፊት አለሁ ነው የሚላቸው። አንዲቷን ቃል አውጥተን እርሷን ለመለወጥ ከመሞከር በፊት የተጻፈበትንም ዓውድ (context) ማየት ያስፈልገናል።

ኢየሱስ የመለሰው መልስ፤ አንተ ሃምሳ አመት ያልሞላህ አብርሃም ምን እንዳደረግ ልታውቅ ቻልክ፤ እርሱን አይተኸዋል? ለሚለው ጥያቄ ነው። ምክንያቱም ኢየሱስ በመጽሐፍ ቅዱስ ያልተጻፈ አብርሃም ያደረገውን ማለትም የክርስቶስን ቀን እንዳየ ስለተናገረ ነው። እንግዲህ በመጽሐፍ ያልተጻፈ ነገር አንተ እንዴት ልታውቅ ቻልክ? አንተ አምሳ አመት ያልሞላህ አብርሃምን አይተኸውልን? ለሚለው ጥያቄ ነው ኢየሱስ በቀጥታ አዎ ከአብርሃም በፊት እኔ አለሁ ያለው። እንጂ አይ በመንፈስ ነው ያየሁት እንጂ በዚያ ጊዜስ አልነበርኩም አላለም። ዓውደ ምንባቡ(context) ግልጽ ነው። ኢየሱስ በመጽሐፍ ያልተጻፈ የአብርሃምን ሥራ ያየው በዚያ ስለነበር ነው እንጂ በመንፈስ አሁን ተገለጠልኝ አላለም።

የጌታ ጸጋ ይብዛልህ!
ሰላም ወገኔ። ስለቀናው መልስህ አሁንም እግዚያብሄር ያክብርልኝ። እንዳልከው እኔ ለመወያየት እጅግ ፈቃደኛ ነኝ። ብትችል ጽሁፎቹን ብታሳጥራቸው፡ ሃሳባችንን ለመግለጽ ይመቻል ባይ ነኝ። ከላይ ያስቀመጥከውን (እብ 1፣ ዩሃ 1 እና ቆላ 1) ብቻ ላይ እናተኩርና፡ ከዚያ ደግሞ ወደሌሎቹ እንሂድ። ማለቴ፡ በነዚህ ጥቅሶች ሃሳብ ዙሪያ እንወያይ ማለቴ ነው። ያው እነዚህን ያግዛል የምንለውን የመጽሃፍ ቅዱስ ክፍል የመጥቀስ መብታችን እንደተከበረ ሆኖ ማለት ነው።

እብ 1፡1-3 " ከጥንት ጀምሮ እግዚያብሄር በብዙ አይነትና በብዙ ጎዳና ለአባቶቻችን በነቢያት ተናግሮ ሁሉን ወራስ ባደረገው ደግሞም ዘመናትን በፈጠረበት በልጁ በዚህ ዘመን መጨረሳ ለእኛ ተናገረን" እዚህ ክፍል ላይ፡ አንድ አምላክ ብቻ በብሉይ ኪዳን ይናገር እንደነበር ግልጽ ነው። ምክንያቱም እግዚያብሄር ነው በብዙ አይነት ጎዳና ለአባቶቻችን የተናገረው። እግዚያብሄር በልጁ በብሉይ ኪዳን ተናግሮ አያውቅም ነበር። ማለትም ልጁ ብሉይ ኪዳን ላይ ምንም ነገር አላደረገም ማለት ነው። ልብ ልንለው የሚገባው ነገር፡ እግዚያብሄር በብሉይ ኪዳን ላይ ልጅ አልነበረውም። የልጁ ህይወት የጀመረው በቅድስት ድንግል ማርያም ማህጸን ውስጥ ነው። ሉቃስ 1፡31-32 "እነሆ ትጸንሳለስ ወንድ ልጅም ትወልጃለስ ስሙንም ኢየሱስ ትይዋለስ። እርሱም የልኡል ልጅ ይባላል..." ይላል። የሚወለደው ልጅ ነው የልኡል ልጅ ተብሎ የሚጠራው እንጂ፡ ማርያም በብሉይ ኪዳን ልጅ ሆኖ የኖረን ነገር አደለም የወለደችው። የእብራውያን ጸሃፊም በእብ 1፡5 ላይ " አንተ ልጄ ነህ እኔ ዛሬ ወልጄሃለሁ። ደግሞም እኔ አባት እሆነዋለሁ እሱም ልጅ ይሆነኛል ያለው ከቶ ለማን ነው?" ይላል። እግዚያብሄር የኢየሱስ አባቱ ሆነ። ኢየሱስ ከመንፈስ ቅዱስ ስለተጸነሰ አንድያ የእግዚያብሄር ልጅ ተብሎአል። ሉቃ 1፡32ን ተመልከት። ሌላው ሃሳብ አለማትን በፈጠረበት የሚለው ነው። አለማት ተብሎ የተተረጎመው የግሪክ ቃል ኤኦናስ (ኮንኮርዳንስ ቁጥር 165ን ተመልከት) ነው። ኤኦናስ ማለት ደግሞ ዘመናት እንጂ አለማት (ዩኒቨርስ) ማለት አይደለም። እግዚያብሄር በልጁ በኩል አዲስ ዘመናትን ፈጥሮአል ማለት ነው። እብ 1፡8 ላይ "ስለ ልጁ ግን አምላክ ሆይ ዙፋንህ ከዘመናት ወደ ዘመናት (ኤኦና ቶኡ ኤኦን) ጸንቶ ይኖራል። የሚለውም ለዚህ ነው። ሉቃስ 1፡32-33ን አመሳክር።

ይቀጥላል.....
የጌታ ሰላም ይብዛልህ!

እሺ ምክርህን ተቀብዬአለሁ፤ ለማሳጠር እሞክራለሁ።

ዕብራውያን ላይ ስላለው ዓለማትን የሚለው ቃል እውነት ነው በግሪኩ Aeon ነው የሚለው፤ ሆኖም ትርጉሙ ግን አንተ እንዳልከው ዘመናት ማለት ብቻ አይደለም። በእርግጥ ቃሉ እንደ ዓረፍተነገር አገባቡ ዘመናትም ተብሎ ሊተርጎም ይችላል። ሆኖም ግን በዚህ በዕብራውያን 1፡2 ያለውና እንዲሁም ይሄው ቃል በዕብራውያን 11፡3 ላይ "ዓለሞች በእግዚአብሔር ቃል እንደ ተዘጋጁ፥ ስለዚህም የሚታየው ነገር ከሚታዩት እንዳልሆነ በእምነት እናስተውላለን።" የሚለው፤ ማለትም ስለ ፍጥረትና ስለሚታዩ ነገሮች የሚናገረው ክፍሎች ላይ "ዓለማት" የሚለው ትርጉም ነው ያለው። ምርጡና ዋናውን የግሪክ መዝገበ ቃላት BDAGን ብትመለከት ይኸው ቃል በነዚህ በሁለት ጥቅሶች ላይ ዓለማት ተብሎ መተርጎም እንዳለበት ይገልጻል። እንዲሁም ሁሉም ዋና ዋና የእንግሊዝኛ ትርጉሞች ማለት ይቻላል፤ Evangelical ያልሆኑትም ጭምር እነዚህን የዕብራውያን ክፍሎች Worlds ብለው ነው የተረጎሙት እንጂ፤ ages እያሉ አይደለም። ለማረጋገጥ እዚህ ተመልከት

መቼም የኢየሱስን ከሰማይ መምጣትንና ከመወለዱ በፊት መኖሩን ልትቀበለኝ አልቻልክም፤ በጣም ብዙ ማስረጃዎችንም ብሰጥህ። መቼም ምን ይደረጋል። ስለዚህም ጠቅላላ የዮሐንስ ወንጌልን መሠረታዊ መልእክት እንዳለ ከንቱ ነው ያደረግኸው። ምክንያቱም የዮሐንስ ወንጌል ከማርያም ሳይሆን ታሪኩን የጀመረው ከፍጥረት በፊት ከነበረው ከቃል ነው። ጠቅላላ ሃሳቡን የመሠረተው ኢየሱስ ከአብ እቅፍ ከሰማይ የመጣ ነውና እርሱ የአብንና የሰማዩን ነው የሚናገረው በሚለው ሃሳብ ላይ ነው። ሙሉውን የዮሐንስ ወንጌልን ዝም ብለህ እስቲ አንብበው።

እስከዚያው ግን እስቲ የሚከተሉትን ጥቅሶች እንደገና አምብባቸው። ኢየሱስ ራሱ እኔ ከሰማይ ነው የመጣሁት፤ የምኖረውም በሰማይ ነው እያለ የሚናገረውን።
Quote:
የዮሐንስ ወንጌል

3፥13 ከሰማይም ከወረደ በቀር ወደ ሰማይ የወጣ ማንም የለም፥ እርሱም በሰማይ የሚኖረው የሰው ልጅ ነው።

6፥51 ከሰማይ የወረደ ሕያው እንጀራ እኔ ነኝ፤ ሰው ከዚህ እንጀራ ቢበላ ለዘላለም ይኖራል፤ እኔም ስለ ዓለም ሕይወት የምሰጠው እንጀራ ሥጋዬ ነው።

16፥28 ከአብ ወጥቼ ወደ ዓለም መጥቻለሁ፤ ደግሞ ዓለምን እተወዋለሁ ወደ አብም እሄዳለሁ።

17፥5 አሁንም፥ አባት ሆይ፥ ዓለም ሳይፈጠር በአንተ ዘንድ በነበረኝ ክብር አንተ በራስህ ዘንድ አክብረኝ።

እግዚአብሔር ይባርክህ!
ሰላም ላንተ ይሁንልኝ። ኤኦንስ የሚለው የግሪክ ቃል አለማት ተብሎ በብዙ ትርጉሞች መተርጎሙን ትክክል ነህ። ይሄ ግን ሃዋርያት ቃሉን ሲጠቀሙ ዩኒቨርስን ለማመልከት መፈለጋቸውን ሊያሳይ አይችልም። ኤኦንስ የሚለው ቃል የገባባቸው ቦታዎች ሁሉ ላይ ዘመናት ተብሎ ቢተረጎምም እንኳ መልእክቱን ፈጽሞ አይለውጠውም። እስቲ ይህንን ሊንክ ተጫነውና ኤኦንስ የሚለው ቃል የገባባቸው ቦታዎች ሁሉ ላይ ዘመናት የሚለውን ቃል እየተካህ አንብበው። የጸሃፊዎቹን ሃሳብ ፈጽሞ አይቃረንም። አለማት (ዩኒቨርስ) ብሎ ቢተካ ግን ፈጽሞ ከአውዱ የራቀ ሃሳብ ያመጣል። እብ 11፡3 ላይም "ዘመናት በእግዚያብሄር ቃል እንደተዘጋጁ..." ቢባል ከሃሳቡ ጋር ፈጽሞ ይሄዳል። ልብ በል ሃዋርያቶች ይጠቀሙት የነበረው ግሪክ (ኮይኒ ግሪክ) ከአሁኑ ግሪክ ጋር ይለያያል። እናም መጽሃፍትን የምንመረምረው በመጽሃፍ ቅዱስ አጠቃቀም ቢሆን ወደ ትክክለኛው ትርጉም ያደርሰናል ብዬ አምናለሁ።

ወደ ዩሃንስ ወንጌል ንስገባ፡ ዩሃንስ ብዙውን ነገር በስእላዊ አገላለጽ ነው ያስቀመጠው። ለምሳሌ ያህል አንተ የጠቀስካቸውን ክፍሎች እንይ እስኪ፦
ዩሃ 3፡13 "ከሰማይ ከወረደው በቀር ወደ ሰማይ የወጣ ማንም የለም፡ እሱም በሰማይ የሚኖረው የሰው ልጅ ነው።" ይሄ ክፍልን ስናይ ፡ በመጀመሪያ ጌታ ኢየሱስ ይህንን ሲናገር ወደ ሰማይ አልወጣም ነበር። እና ወደ ሰማይ ከመውጣቱ በፊት ወደ ሰማይ እንደወጣዳድርጎ መናገሩ፡ ሊተራል አለመውሆኑን እንረዳለን። ዩሃንስ 6፡51 "ከሰማይ የወረደ ህያው እንጀራ እኔ ነኝ።" ይሄም ፍጹም ስእላዊ አነጋገር ነው። ኢየሱስ የሚበላ እንጀራ/ ዳቦ አይደለም። ዩሃ 16፡28 "ከአብ ወጥቼ መጥቻለሁ፡ ደግሞ አለምን እተዋለሁ ወደ አብም እሄዳለሁ" ኢየሱስ እግዚያብሄር ልኮት እንደመጣና ወደ አብ እንደሚመለስ ነው የተናገረው በዚህ ክፍል። ከእግዚያብሄር መምጣቱ ከመወለዱ በፊት መኖሩን ያመለክታል ማለት ትንስ ይከብዳል። ለምሳሌ ዩሃ 1፡43 ላይ "በነገው ኢየሱስ ወደ ገሊላ ሊወጣ ወደደ.." ይላል። ሊወጣ የሚለው ቃል ከአብ ወጥቼ ከሚለው የግሪክ ቃል ጋር ፈጽሞ አንድ ነው። በተጨማሪም ኒቆዲሞስ በዩሃ 3፡2 ላይ "ከእግዚያብሄር ዘንድ እንደመጣህ እናውቃለን" ብሎታል። ኢቆዲሞስ የኢየሱስ ፕሪ ኤግዚስታንስ ያምናል ብዬ መቀበል ይከብደኛል። በመጨረሳም ዩሃ 17፡5 ን ጠቅሰሃል። ጌታ ኢየሱስ ከመወለዱ በፊት ይኖር ከነበረ፡ አለም ሳይፈጠር ከማለት ይልቅ በስጋ ሳልገለጥ ባንተ ዘንድ በነበረኝ ክብር አክብረኝ ብሎ ይጸልይ ነበር። አለም ሳይፈጠር እግዚያብሄር መሲሁን ያውቀው ነበር። 1ኛ ጴጥ 1፡20-21ን ተመልከት። ክርስትያኖችም በክርስቶስ በኩል አለም ሳይፈጠር በእግዚያብሄር ፊት ክብር አላቸው። ኤፌ 1፡3-6ን ተመልከት።

ሰላም ሁንልኝ!
የጌታ ሰላም ይብዛልህ!

Aeon ስለሚለው የግሪክ ቃል እኮ scholar's standard lexicon የሆነውን BDAGን ተመልከት ብዬህ ነበር። እዛ ላይ መጽሐፍ ቅዱስ ላይ ብቻ ሳይሆን ከመጽሐፍ ቅዱስ ውጭ በዚያው ዘመን የተጻፉ የግሪክ literaturesን በመጥቀስ፤ ይህን ቃል ግሪኮች worlds (universe) ለሚለው ትርጉም ይጠቀሙበት እንደነበር ተጽፎአል። እንደምታውቀው የግሪክ ቃላት ብዙዎች semantic range የሚባል ነገር አላቸው። ማለትም አንድ ቃል እንደየዓረፍተ ነገሩ የተለያየ ትርጉም ይሰጣል። ለዚህ ነው ብዙ የግሪክ ቋንቋ ሊቆችና የብዙ modern መጽሐፍ ቅዱሶች ይህንን ቃል በዕብራውያን ላይ በትክክል ዓለማት ብለው የተረጎሙት።

መቼም ኢየሱስ ዓለም ሳይፈጠር በፊት ስለመኖሩ፤ እንዲያው ቃልም ሥጋ ሆነ ከሚለው ጀምሮ፤ ዓለም ሳይፈጠር በፊት በአንተ ዘንድ በነበረኝ ክብር አክብረኝ የሚለውንና ሌሎችንም ከአብርሃም በፊት እኔ አለሁ የሚለውንም ጨምሮ ብዙ ብዙ ማስረጃዎች ብሰጥህ፤ አይ ምሳሌ ነው ምናምን እያልክ ፈጽሞ የዮሐንስ ወንጌልን የመልእክቱን እምብርት አውጥተህ ቀፎውን አስቀረኸው አይደል።

እንግዲህ አውቆ የተኛን ቢቀሰቅሱት የሚባል ነገር ሆነ እኮ :-) ጭራሽ እኮ የዮሐንስ ወንጌል ስላልተስማማኝ እንደገና እኔው ለዋውጪ ልጻፈው ብትል ይሻላል :-)

አንድ የወገናዊነት ምክር ልምከርህ።

እኔ ከብዙ ሃይማኖት ተከታዮች ጋር ብዙ ውይይቶች አድርጌአለሁ። አንተን ስገምትህ (ከተሳሳትኩ አርመኝ) የጆቫ ሃይማኖት ተከታይ ትመስለኛለህ። ከሆንክ በብዙ የጆቫ እምነት ተከታዮች ያየሁት አንዱና ዋነኛው ችግር፤ መጽሐፍ ቅዱሱን ወይም ከመጽሐፍ ቅዱስ አንዱን መጽሐፍ እንዳለ ብዙዎቹ አላነበቡትም። በጣም ይገርመኛል ሁሌም። ምንባቡን ሁሉም ካልተነበበ አንዱን አረፍተ ነገር ጸሐፊው ለምን እዛ ቦታ እንደዚያ አድርጎ እንደጻፈውና ለምን እነዚያን ቃላቶች እዚያው ምንባብ ላይ እንደተጠቀመ የጸሐፊውን ሃሳብ ማወቅ በፍጹም አይቻልም። እናም ብዙ ጊዜ የሚያደርጉት ከክፍሉ ዓውድ (context) ወጥተው አንዷ ቃል በሌላ ቦታ፤ በሌላ ምንባብ፣ በሌላ ሃሳብ ወዘተ ከተጻፈው ጋር ያወዳድሩታና ፈጽሞ ደራሲው ሊለውና ሊናገረው ወዳላሰበው መደምደሚያ ይደርሳሉ።

እንደዚህ ካደረግን እኮ የፈለግነውን ነገር መጽሐፍ ቅዱስን ብሏል ልንል እንችላለን። ምክንያቱም ዓወደ ምንባቡንና የደራሲውን ሰፋ ያለውን ሃሳብና ያንን ቃል ለምን እንደተጠቀመ ከመመርመ ይልቅ፤ የሆነ ቦታ ተመሳሳይ ቃል ፈልገን "ይሄው ቃሉ እዚህ ጋ እንዲ ተብሏል" ካልን፤ የፈለግነውን ነገር ደራሲውን ማስባል እንችላለን። ይሄ ግን መጨረሻው confusion (ባቢሎን) ነው።

ስለዚህ እኔ ብዙ የጆቫ እምነት ተከታይ ወገኖቼን በፍቅር የምመክራቸው፤ እባካችሁ እባካችሁ ደራሲው ያንን ቃል በዚያ ዓረፍተነገር ሲጠቀም ምን ለማለት እንደፈለገ እንድታውቁ ቢያንስ ቢያስን አንድ ጊዜ እንዳለ መጽሐፉን አንብቡት።

አንተ ስለ ዮሐንስ ወንጌል ያልካቸውና ኢየሱስ ከሰማይ አልመጣም ብለህ ለማብራራት የሞከርከው ትልቁ ችግር እንደ እኔ አመለካከት የሚነሳው ከዚህ ነው። ዮሐንስ ሊለው የፈለገውን ሃሳብና የመልዕክቱን ግንድ ለማየት፤ ሙሉውን መጽሐፉን ብትችል ደጋግመህ ማንበብ ያስፈልጋል። እባክህ እንደ ወንድም የምመክርህ ሙሉውን መጽሐፍቱን አንብበው። ማንም ትንሽ መሠረታዊ የመጽሐፍ ቅዱስ አጠናን ዘዴ Biblical hermeneutics የሚያውቅ ሰው የዮሐንስ ወንጌል መልዕክቱን የመሠረተውና ዋና ግንዱ ያደረገው፤ ኢየሱስ ዓለም ሳይፈጠር በፊት በአብ ዘንድ የነበረና ከሰማይ የመጣ ወደ ሰማይም የሚሄድ ነው በሚለው ሃሳብ ላይ ነው። እናም እርሱ ብቻ ነው ማንም ያላየውን እግዚአብሔርን በትክክል ሊተርክ የሚችል፤ ምክንያቱም ዓለም ከመፈጠሩ በፊት ከእግዚአብሔር ጋር ነበረና የሚለው ሃሳብ ነው የዮሐንስ ወንጌል የመልእክቱ ግንድና ዋና ሃሳብ።

ከላይ እንዳልኩህ አንተ ቃላቶቹን ስላልተስማማህ እየለወጥክ፤ እየሞረድክ ጭራሽ ዓለም ከመፈጠሩ በፊት የሚለውን ስላልተስማምህ "በሥጋ ሳልገለጥ በፊት" ብለህ ለወጥከው።

አሁን እዚህ ጋ ላብቃ ይሄ መጽሐፉን ሙሉን ከማንበብና ሃሳቡን በነጻነት እንዳለ ለመረዳት ከመፈለግ ይልቅ፤ ሃሳቡ አልተስማማኝምና ብዙ ቦታ ልለዋውጠው የሚለው አካሄድ ወደ ተሳሳተ መንገድ ይመራል። እውነትን ከሃይማኖታችን አብልጠን ልንወድዳት ይገባል። ከፕሮቴስታንትነታችን ወይም ከጆቫነታችን ወይም ከኦርቶዶክስነታችን ይልቅ የመጽሐፍ ቅዱስን እውነት ልነወዳት ይገባል ብዬ በዚህ ወገናዊና ልባዊ ምክር እሰናበትሃለሁ።

የጌታ መንፈስ ወደ እውነት ሁሉ ይምራህ!
ሰላምና ጸጋ ላንተ ይሁንልኝ። ኤኦንስ የሚለውን ቃል ዩኒቨርስን ያመለክታል ብለው የተረጎሙ ወይም የሚያስቡ የግሪክ ስኮላሮችም ጭምር መኖራቸውን አልካድኩም። ለምሳሌ የግሪክ ስትሮንግ ኮንኮርዳንሶችን ብትመለከት (ሚ/ር ስትሮግንግ) ቴኦስ ለሚለው ቃል ስላሴን ማለትም እግዚያብሄር አብን እግዚያብሄር ወልድን እግዚያብሄር መንፈስ ቅዱስን ያመለክታል...በተጨማሪም ለሌሎች እንደሚውል ተናግሮአል። ይሄ ግን ስላሴ መኖሩን ማስረጃ አድርገን መቀበል አንችልም። ሰውዬው የኦይኒ ግሪክ ሊቅ ቢሆንም እንኳ ስላሴን የጠቀሰው የራሱን እምነት ማንጸባረቂያ ከመሆን አያልፍም። የእብራውያን ጸሃፊም በእብ 1፡1-3 ላይ ዘመናትን በፈጠረበት በልጁ ነው ያለን። ከጸሃፊው ሃሳብ ጋርም ፍጹም ይሄዳል። የእብራውያን ጸሃፊ ልጁ አለም ሳይፈጠር ነበር ብሎ ፈጸሞ አያንምንም። ምክንያቱም በእብ 1፡5-7 "አንተ ልጄ ነው ዛሬ ወለድኩህ፡ ደግሞም እኔ አባት እሆነዋለሁ እሱም ልጅ ይሆነኛል" እያለ ጸፎአል። እንግዲህ ልጁ አለም ሲፈጠር ልጅ ከነበረ እንዴት ነው እግዚያብሄር ዛሬ ወለድኩህ ያለው? እንዴትስ ነው እኔ አባት እሆነዋለሁ እሱም ልጅ ይሆነኛል የሚለው? በሉቃ 1፡32-35 ላይም "የልኡል ልጅ ይባላል" ለምን ተባለ? እነዚህ ሁሉ እግዚያብሄር ልጅ እንደሚወልድ/እንደወለደ እንጂ ልጅ እንደነበረው አያሳዩም።ዓለማት ስለሚለው እስቲ እብ 2፡5፣ 9፡26 ተመልከተት። እንዲያው አለማት ተብሎ መተርጎም አለብት ቢባል እንኳ፡ እግዚያብሄር በዘፍጥረት ላይ ስለፈጠረው ግዙፍ ዩኒቨርስ ይናገራል ለማለት አያስረፍርም። እግዚያብሄር ክርስቶስን ልጅ ያደረገው ኢየሱስ ከማርያም ሲወለድ ነው። የእብራውያን ጸሃፊም ይህንን ነው ያንጸባረቀው። የሚመጣውን አለም/ዘመን በክርስቶስ በኩል ነው እግዚያብሄር የፈጠረው። ቆላ 1፡15-19 ላይም ይሄንን ነው የሚነግረን። በሰማይና በምድር ያሉት ሃይላት ቢሆኑ ስልጣናት አለቅነት ቢሆኑ ገዥነት በእርሱ በኩልና ለእርሱ ተፈጥሮአል ይላል። ከቁጥር 13 ብንጀምር ስለ ልጁ መንግስት ነው የሚያወራው። ልጁም ከጥረት ሁሉ በፊት በኩር ነው። ሮሜ 8 ላይ "ልጁ በብዙ ወንድሞች መካከል በኩር ይሆን ዘንድ ይላል" እነዚህ ወንድሞች ደግሞ በክርስቶስ የእግዚያብሄር አዲስ ፍጥረቶች ናቸው። (2ኛ ቆሮ 5፡17) ተመልከት። ራእይ 3፡14 ላይም ኢየሱስ የእግዚያብሄር የመጀመሪያው ፍጡር እንደሆነ ይናገራል። ይሄ ኢየሱስ ከሰማይና ከምድር በፊት ተፈጠረ ማለት አይደለም። ኢየሱስ ከሞት ሲነሳ አዲስ ሰማያዊ አካል ለብሶ ነው የተነሳው። ይሄ አካል ነው አዲስ ፍጡር የሚያሰኘው። ክርስትያኖችም በትንሳኤ የክርስቶስን አይነት ሰማያዊ አካል ይሰለማሉ። ክርስቶስ እንደ በኩራት ነው፡ ከዚያም ለክርስቶስ የሆኑት ይላል ቃሉ። 1ኛ ቆሮ 15፡23ን ተመልከት።

የዩሃንስ ወንጌል ላይ ያሉት ጽሁፎች አንዳቸውም ኢየሱስ ሊትራሊ ፕሪ ኤግዚስት አድርጎአል አይሉም። ለምሳሌ፣ ከሰማይ የወረደ እንጀራ/ዳቦ እኔ ነኝ ይላል። ይሄ ሊትራል ነው ወይስ ስእላዊ አገላለጽ? ለምሳሌ ያእቆብ 1፡17 ላይ "መልካም ስጦታ ሁሉ ከብርሃናት አባት ዘንድ ይወርዳል" ይላል። ይሄ ምን ማለት ይሆን? ከሰማይ ዱብ ብሎ ይወርዳል ማለት ነው ወይስ እግዚያብሄር መልካም ስጦታዎችን ይሰጣል ማለት ነው? ኢየሱስን ከእግዚያብሄር ለሰው ልጆች የተሰጠ መንፈሳዊ ስጦታ መሆኑን ነው እየተናገረ ያለው።

መልካም ጊዜ!
የጌታ ሰላም ይብዛልህ!

ፈረንጆች back to square one የሚሉት ነገር አለ። እናም የእኔና የአንተ ምልልስ እንደዚያ ሆነብኝ። ማለትም ዞሮ ዞሮ ወደ ተነሱበት መመለስ ማለት ነው።

እኔ የመጀመሪያውን ከላይ ስለ ስላሴ የሚያብራራውን መልስ ስሰጥ አንድ ያልኩት ነገር ነው አሁንም ዞሮ ዞሮ የሚሆነው ነገር። ይሄውም የስላሴ ትምህርት ተለጥጦ አንድ ጫፍ ላይ ያለ ትምህርት እንደሆነ ሁሉ አንተና የኢየሱስን አምላካዊ ባሕርይና ከመወለዱ በፊትና ዓለም ሳይፈጠር መኖሩን የማትቀበሉ ሰዎች ደግሞ ሌላኛው ጫፍ ላይ ናችሁ።

ሁለታችሁም የተወሰኑ የመጽሐፍ ቅዱስ ክፍሎችን የግድ እንደ እንጀራ ልጅ በማየት ማፈን አለባችሁ እንጂ በሁለቱም አቅጣጫ የሚናገረውን የመጽሐፍ ቅዱስ ክፍሎች በሙሉ ለመቀበል በፍጹም አትችሉም። ስለዚህ ሚዛናዊ ያልሆነና ወደ አንድ ጎን በእጅጉ ያጋደለ መደምደሚያ ላይ ትደርሳላችሁ።

አንተ ኢየሱስ ዓለም ሳይፈጠር በፊት ስለመኖሩና አምላካዊ ባሕርይውን የሚያሳዩትን ክፍሎች ስታነብብ allegory (ስዕላዊ) የሚባለውን አተረጓጎም ትጠቀማለህ። በመጽሐፍ ቅዱስ ደግሞ ለሆነው ላልሆነው ሁሉ allegorymethod መጠቀም፤ የምንባቡና የመጽሐፉ ትርጉም ከጸሐፊው ነጥቆ አንባቢው እንደመሰለው እንዲተረጉመው በር ይከፍታል። የትርጉሙና የመልዕክቱ ባለስልጣን ጸሐፊው መሆኑ ይቀርና አንባቢው ይሆናል።

አንተን የሚደግፉ የመጽሐፍ ቅዱስ ክፍሎችን ስትተረጉም literal method ትጠቀማለህ፤ ማለትም ያው የተጻፈውን እንዳለ ትቀበላለህ እንጂ፤ "ይሄ ስዕላዊ አባባል ነው" ወዘተ አትልም። ከአንተ ጋር የማይሄዱ ዓረፍተ ነገሮችንና ስንኞችን ግን፤ ጸሐፊው ለምን ጻፈ? ምናልባት እኔ የማላውቀውና ያልገባኝ ነገር ሊያስተላፍ ፈልጎ ይሆን? ብለህ ከመመርመር ይልቅ allegory method በመጠቀም "አይ ዓለም ሳይፈጠር በፊት ማለት ዓለም ሳፈጠር በፊት ማለት አይደለም፤ የሆነ ስዕላዊ አባባል ነው፤ ቃል አምላክ ነው የሚለውንም አይ ቃል አምላክ አይደለም ማለቱ ነው" ወዘተ እያልክ ሁለት የተለያዩ የመጽሐፍ ቅዱስ መተርጎሚያ methods ትጠቀማለህ። አንተን የሚደግፈህን ክፍሎች ሁሉ በliteral method ትተረጉመዋለህ፤ አንተን የማይስማማህን ደግሞ ከliteral ወጥተህ allegory method ትጠቀማለህ።

የሚገርምህ ነገር፤ የስላሴ አማኞችም እንዲሁ እንዳንተ ነው የሚያደርጉት። ኢየሱስ አምላክነቱን የሚያሳዩና ዓለም ሳይፈጠር በፊት መኖሩን የሚናገሩትን ክፍሎች በliteral method ነው የሚተረጉሟቸው፤ ሆኖም ግን "አብ ከእኔ ይበልጣል" የሚለውን ወይም ራሱ ኢየሱስ አንዱ እግዚአብሔር ብሎ የሚያምነው አብን እንደሆነ የሚያሳየውንና "ከአንዱ ከእግዚአብሔር በቀር ቸር ማንም የለም" ወዘተ የሚሉትን ከፍሎች literal ሳይሆን allegory method ነው የሚጠቀሙት። "አይ በሥጋ ሰው ስላለ ነው እንጂ በአምላክነቱ ከአብ አያንስም፤ በአምላክነቱ ሁሉን ያውቃል፤ ስለዚህ ክፍሉ ስለ ሥጋው ወራት ብቻ ነው የሚያወራው" ወዘተ የሚል ግራ ወደተጋባ ማብራሪያ ውስጥ ይገባሉ።

Now, እባክህን መጽሐፍ ቅዱስ ሥዕላዊ ቋንቋ አይጠቀምም እያልኩ አይደለምና ስዕላዊ በሆነ መንገድ ልንረዳቸው የሚያስፈልጉ ክፍሎችን እንዳትደረድርልኝ። ጉዳዩ እዚህ ጋር አይደለም። ነገር ግን ከእኛ አመለካከት ጋር ስላልሄዱ ብቻ የግድ በሥዕላዊ መንገድ መተርጎም አለባቸው የምንለው ነገር ትክክል አይደለም።

በሥዕላዊ ካልሆነ በስተቀር በሌላ ፈጽመው ሊተረጎሙ የማይችሉ ክፍሎች ካልሆኑ በስተቀር፤ መጽሐፍ ቅዱስን በቅድሚያ ሁል ጊዜ በliteral መንገድ ነው መተርጎም ያለብን። ማለትም ኢየሱስ "አብ ብቻ የሚያውቀው ልጁ የማያውቀው" ነገር አለ ካለ፤ አለ ማለት ነው። ያንን መቀበል ነው፤ ሌላ ስዕላዊ ምናምን እያልን መዋዠቅ አያስፈልገንም። እንዲሁም "ዓለም ሳይፈጠር በፊት" ካለ ዓለም ሳይፈጠር በፊት ብለን ነው በቅድሚያ መቀበል ያለብን እንጂ፤ አገልግሎት ከመጀመሩ በፊት ወዘተ እያልን መዋዠቁ አያዋጣም። Even በሥዕላዊ አተረጓጎም መተርጎም ያለባቸው እንደ ራእይ ያሉ የመጽሐፍ ቅዱስ ክፍሎችን፤ ያ ሥዕል ወይም ምሳሌ ምን ማለት እንደሆነ ራሱ መጽሐፍ ቅዱስ ነው የሚተረጉመው እንጂ፤ ከሆዳችን የፈለግነውን እየፈጠርን አይደለም። ስለዚህ ጉዳይ ምሳሌዎችን ሰጥቼ በጣም ብዙ ማለት እችል ነበር፤ ሆኖም እዚህ ልቋጨው።

በጣም የሚገርመው አዲስ ኪዳን ራሱ ብሉይ ኪዳን ያሉትን ጽሑፎች ከ99% በላይ የሚተረጉመው literal በሆነ መንገድ ነው። ይህ ደግሞ ለአይሁድ ከባድ የሆኑትንም ክፍሎችን ያጠቃልላል። በብሉይ ኪዳን "አማልክት ናችሁ አልኩ" ብሎ ከተናገረ፤ አዲስ ኪዳን ያንን ክፍል "አይ ስዕላዊ ነው፣ እንዲህ ማለቱ አይደለም" ወዘተ እያለ ወደ በallegory method ሊተረጉመው አይሞክርም። ልብ በል ይህ ክፍል ምንም እንኳን ለአይሁዶች ከባድና "አንድ አምላክ ያሕዌ" ነው ከሚለው የእስራኤላውያን እምነት ጋር የሚጋጭ ቢመስልም።

ስለዚህ ለአንተም የምመክረው፤ ለስላሴ አማኞች የምመክረውን ነው። ከእምነታችን ጋር የሚጋጭ መሆኑ ብቻውን በliteral መንገድ ከመተርጎም ወጥተን ወደ ስዕላዊ አተረጓጎም እንድንገባ ማድረግ የለበትም። እንዲያውም እነዚህ literally ሲነበቡ ከእምነታችን ጋር የሚጋጩ የሚመስሉት እግዚአብሔር እኛን ወደ ተሻለ የእርሱን መረዳት ሊያስገባን የሚችልበት መንገዶች ናቸውና ቻሌንጅ እንዲያደርጉን መፍቀድ አለብን እላለሁ።

እንዳየኸው የጻፍኩት ስለ መሠረታዊ የመጽሐፍ ቅዱስ አተረጓጎም እንጂ ጥቅሶችን ለማብራራት አይደለም። ምክንያቱም ያ ዞሮ ዞሮ መጀመሪያ እንደተናገርኩት ወደ አንዱ ጎን የማዘንበልና ወደ አንዱ ብቻ የመለጠጥ አዝማሚያ እስካለ ድረስና ሁለት የተለያዩ methods እንዳሻን ስለምንጠቀም መተማመን አንችልም። ስለዚህ ጥቅስ እየጠቀሱ የምንፈልገውን በዚህ method የማይስማማንን ደግሞ በሌላ method መተርጎም እስካለ ድረስ ስንሽከረከር መዋላችን ነውና እዚህ ጋ አበቃለሁ።

በዚህ የመጽሐፍ ቅዱስ አተረጓጎምህ እኔን ጨርሶ ልታሳምነኝ በፍጹም ስለማትችል፤ እኔም አንተም እዚሁ ብናበቃ መልካም ነው እላለሁ።
Quote:
የማቴዎስ ወንጌል 16
13 ኢየሱስም ወደ ፊልጶስ ቂሣርያ አገር በደረሰ ጊዜ ደቀ መዛሙርቱን፦ ሰዎች የሰውን ልጅ ማን እንደ ሆነ ይሉታል? ብሎ ጠየቀ።
14 እርሱም፦ አንዳንዱ መጥምቁ ዮሐንስ፥ ሌሎችም ኤልያስ፥ ሌሎችም ኤርምያስ ወይም ከነቢያት አንዱ ነው ይላሉ አሉት።
15 እርሱም፦ እናንተስ እኔን ማን እንደ ሆንሁ ትላላችሁ? አላቸው።


እግዚአብሔር አፍ ለአፍ ተናግሮት ለሙሴ የሰጠውን ሕግጋት እስኪያሻሻል ድረስ "ሙሴ እንዲህ ብሎ ነበር፤ እኔ ግን እላችኋላሁ" የሚል እርሱ ማን ነው?

አጋንንት ሲያዩት የእግዚአብሔር ልጅ እንደሆነ አውቀው "ያለ ጊዜው ልታሰቃየን መጣህን" እያሉ በቃሉ የሚታዘዙለት ማነው?

እግዚአብሔር ብቻ በመቅደስ የማንጻት ሥርዓት የሰዎችን ኃጢአት ይቅር የሚል መሆኑ በሙሴ ሕግ ታውቆ እያለ፤ ያለ መቅደስ ሥርዓት በራሱ ስልጣን "እነሆ ኃጢአትህ ተሰረየችልህ" ብሎ እንደ እግዚአብሔር ኃጢአትን የማስተሰረይ ስልጣን ያለው ማነው?

የእግዚአብሔር ማደሪያ ከሆነው ከእግዚአብሔር መቅደስ የሚበልጥ እርሱ ማነው?

ሰው ወይም ማንም ፍጡር ሊያደርገው የማይደፍረውን፤ "ከእኔ አብ ይበልጣል" እያለ ራሱን ከያሕዌ ጋር የሚያለካካ እርሱ ማነው?

ከእግዚአብሔር ጎን የሚቀመጥ፤ መላእክቱና ኪሩቤሉ በሰማይና በምድር ያለ ፍጥረት ሁሉ ከያሕዌ ጋር ምስጋናና ክብር የሚሰጡት፤ ከእግዚአብሔር ጎን ከእግዚአብሔር ጋር ውዳሴ የሚቀበል እረ እርሱ ማነው?

ሁሉን ካስገዛለት ከእግዚአብሔር በስተቀር በሰማይም ይሁን በምድር ያለ ፍጥረት ሁሉ ከእርሱ በታች ሆነው የሚገዙለት እርሱ ማነው?

በሰማይም ይሁን በምድር ያለ ፍጡር እንኳን ሊከፍተው ይቅርና ሊመለከተው የማይችለውን መጽሐፍ ይከፍት ዘንድ የቻለ እርሱ ማነው?

እንደ ያሕዌ መላእክቱን የሚያዝዝና የሚልክ እርሱ ማነው?

እርሱ ራሱ ከእግዚአብሔር ጋር የአዲሲቱ ኢየሩሳሌም መቅደስ የሆነ እርሱ ማነው?

ከእግዚአብሔር ክብር ጋር አብሮ የአዲሲቷ ኢየሩሳሌም ብርሃን የሆነ እርሱ ማነው?

ከእግዚአብሔርና ከእርሱ ዙፋን እንደ ብርሌ የሚያንጸባርቅ የሕይወት ውኃ ወንዝ የሚወጣ እርሱ ማነው?


...

ሰዎች የሰውን ልጅ ማን እንደ ሆነ ይሉታል? እናንተስ?


የጌታ ጸጋ ይብዛልህ!
እኔ እንኳን ድምጽ ሰጥቼህ ስላልረካሁ በቃላት ላመሰግንህ ወዳለሁ። እግዚአብሔር ይስጥልኝ።
ድንቅ መማማር!

በግሌ መ/ቅ ሲጠና (ማንኛዉም መጸሃፍ) ጸሃፍቱ ማለት የፈልጉትን ማወቅ ተቀዳሚ ተግባራችን መሆን እንዳለበት አስተምረህኛልና ሳላመሰግነህ ማለፍ አልችልም። ከእንግዲህ ሳነብ በተለየ አቀራረብ እንዲሆን እና ማብራሪያ ብፈልግም ፍጹም ገለልተኛ ወይንም ግራ/ቀኝ ዘመም ካልሆኑ ግለሰቦች እንዲሆን ተምሬበታልሁ። በርግጥም በየግላችን ፍለጋችን እውነትን እና እውነትን ብቻ ሆኖ ሳለ እንዳለመታደል ሆኖ ብዙወቻችን ፍቅራችን ከእምነት ድርጅቶች ጋር ይመስላል።
ለኔ በትልቁ ተምሬበታልሁና በጣም እግዚያብሄር ይስጥልኝ!!
በተነገሩት ነገሮች እስማማለሁ። ነገር ግን ሁላችሁም አንድን መሰረታዊ ሃሳብ እየሸሻችሁ እንደሆነ እያየሁ ነው። ራዕይ 3፡14 "በእግዚአብሔር ፍጥረት መጀመሪያ" (the beginning of creation by God) እያለ እንዲሁም ቆላስይስ 1፡15 "የፍጥረት በኩር" (the first-born of all creation) የሚሉ አገላለፆችን ለኢየሱስ ክርስቶስ ይጠቀማሉ። እነኚህን የመሳሰሉ ጥቅሶችን ከግንዛቤ ብታስገቡ ትምህርቱ ምሉዕ ይሆን ነበር።

አንድ ጸሐፊም በተመሳሳይ ጉዳይ እንዲህ ዓይነት ሃሳብ በመጽሐፍ ቅዱስ የለም ብሎ አፉን ሞልቶ ሲናገር ገርሞኛል።

ይህ ነጥብ የክርስቶስን ክብር የሚያወርድባችሁ መስሏችሁ እንዳለፋችሁት ወይም አርዮሳዊ ትምህርት ታስተምራላችሁ እንዳትባሉ የሰጋችሁበት ነጥብ ይመስለኛል።

መድረኩን ላዘጋጁት ግን አክብሮቴን ሳልገልጽ አላልፍም።
አንድ እርማት ልሰጥ እወዳለሁ፦

የውይይቱ ተካፋይ የጆቫ (የይሖዋ ምስክሮች) እምነትን የሚያራምድ አይደለም። በችኮላ የተሳሳተ መደምደሚያ ላይ አትድረስ እንዲሁም ለሌሎች የተሳሳተ መረጃን አታስተላልፍ። የይሖዋ ምስክሮች አንተ እንደምትለው ነው ስለኢየሱስ የሚያስተምሩት። ኢየሱስ ከማርያም ከመወለዱ በፊት በሰማይ ከአባቱ ጋር እልፍ አእላፍ ዘመናት እንደኖረ ያምናሉ። የኢየሱስ ህይወት የጀመረው በዚህች ምድር ላይ ነው የሚል እምነት የላቸውም።

ይሁንና ከመልዕክትህ እንደተረዳሁት ከአንተ ጋር የሚለያዩት ኢየሱስ "የፍጥረት መጀመሪያ ነው" የሚለውን በመቀበላቸው ነው። (ራዕይ 3፡14፤ እና ቆላስ. 1፡15፣16) አንተስ እነዚህን ጥቅሶች እንዴት ትመለከታቸዋለህ?

ከዌብ ሳይታቸው ስለኢየሱስ የሚያስተምሩትን ለማየት ይህንን http://www.jw.org/am/የይሖዋ-ምሥክሮች/ተየጥ/በኢየሱስ-ማመን/ መመልከት ትችላለህ።

አመሰግናለሁ።
0 ድምጾች
ይህን ለሚያነቡ ሁሉ የጌታ ሰላም ይሁን። አሜን!!!

ስላሴ የሚለው ቃል በመሰረቱ የግዕዝ ቃል ነው የሚያመለክተውም ሶስት የመሆን ነው። ክርስትና በአብ በውልድ በመንፍስ ቅዱስ አካልት በመለኮት ደግሞ አንድ እግዚአብሔር ብለን እናምናለን።

ይህን የአንድ እና የሶስት መሆን ምስጥር በራሳቸው ጭንቅላት ማየትና ማሳብ ሲጀምሩ ስለማይገባቸው ከክርስትና ለየት ያለ የእምነቶችን ፈሊጥ የመሰረቱ ብዙ ናቸው። እግዚአብሔርና አላህ አንድ አይደሉም ምክንያቱም እኛ ክርስቲያኖች አንድያ ልጁን ለመራራ የጎልጎታ መስቀል ሞት አሳልፎ በመስጠት በልጁ ክቡር ደም ዋጅቶ ዕርቅን ከአብ ጋር በኢየሱስ አገኘን ብለን የምናምን ነን።

በአላህ የሚያምኑ ደግሞ እላህ አይወለድም አይወልድም ይላሉ። ትልቅ ልዩነት ስለሆነ የተለያዩ እንጂ አንድ አይደሉም። እግረ መንገዴን ጠቀስኩት እንጂ ከጥያቄው ጋር የተየያዘ እንዳልሆነ ስቸው አይደለም።

በዘፍጥረት ምዕራፍ አንድ ላይ እግዚአብሔር ሰውን በመልካችን እንደ ምሳሌአችን እንፍተር ይላል። እዚህ ላይ ከነማን ጋር ነው እግዚአብሔር ይህን ውይይት የሚያደርገው ያለ ብሎ መጠየቅ ግዴታ ነው። ከምላዕክት ጋር አይደለም እግዚአብሔር ከመላዕክት ልዩ ነውና ታድያ ከማን ጋር ነው? ከወልድና ከመንፈስ ቅዱስ ካልሆነ ሌላ ሊሆን አይችልም። በዘመናት ስናይ ሶስቱ ስራቸውን አንድ ላይ እንድሚሰሩ የምንረዳበት መንገድ ብዙ አለ።

ገብረኤል መልአክ ወደ ማርያም ከእግዚአብሔር ተልኮ እንደምጣና እንደ ምትፀንስና ወንድ ልጅም እንደምትወልድ ነገራት። እኔ ወንድ አላውቅም እንዴት ብላ ስትጠየቅው የመልአኩ መልስ ታይቶ ተሰምቶ የማያውቅ ነበር። መንፈስ ቅዱስ በአንቺ ላይ ይመጣል የልዑልም ኃይል ይጸልልሻል ስለዚህም ካንቺ የሚወለደው ቅዱስ የእግዚአብሔር ልጅ ይባላል አላት (ሉቃ1፡26-36)

ኢየሱስ ደግሞ ስለ ጌታ መንፈስ ቅዱስ ክቡርና በታም ቅዱስ መሆኑን ሲያስተምረን በሰው ልጅ ላይ ቃል የሚናገር ሁሉ ይሰረይለታል በመንፈስ ቅዱስ ላይ ግን የሚናገር ሁሉ በዚህ ዓለም ቢሆን ወይም በሚመጣው አይሰረይለትም ይላል ማቴ 12፡32።

መቸም በስጋ እስካለን ድረስ ይህ የስላሴ አንድነት ምስጥር እንደሆነ ይቀራል። እንግዲህ ይህ አጭር ቅምሻ ጣፈጠ´ኝ ድገምኝ የሚያሰኝ ሆኖ በግል ቃሉን ከምልጃና ጸሎት ጋር እየቀረብን በተጨማሪ ሌላ መጻህፍት በማየት እንዲያስተምረን እንትጋ እላለሁ።

ጌታ ይባርካቹህ
ወንድማችሁ
5 ዓመታት በፊት ስም-አልባ የተመለሰ
ግን እኮ አንተ ያልከውንም የብሉይ ኪዳኑን "እንፍጠር" የሚለውንም እያነበቡም ቢሆን አይሁዳውያን ሁልጊዜም ሲነገራቸው የነበረውና የሚያምኑት "እግዚአብሔር አምላክ አንድ አምላክ ነው" በሚለው ነው እንጂ፤ አሁን አንተ እንደምትለው አይነት፤ ምስጢር ነው ምናምን ወደሚል መረዳት አልደረሱም።

ስለ መንፈስ ቅዱስም ቢሆን በዘፍጥረት ላይ "የእግዚአብሔርም መንፈስ በውሃ ላይ ሰፍፎ ነበር" እና በኢዮብ "የእግዚአብሔር መንፈስ ፈጠረኝ" የሚለውንም እያነበቡም ቢሆን ስላሴ ወደሚል አስተሳሰብ ወይም እግዚአብሔርና መንፈስ ቅዱስ የተለያየ ስብዕና አላቸው ወደሚል መረዳት አልደረሱም። እነዚያን የብሉይ ኪዳን መጻሕፍት እያነበቡም ቢሆን፤ ኢየሱስም ይሁን ጳውሎስ ወይም አይሁዳውያን አንድ ብቸኛ አምላክ እግዚአብሔር ነው ነበር የሚሉት እንጂ ምስጢር ነው ስላሴ ነው ወዘተ ወደሚል መረዳት አልመጡም።

እናም ስላሴ የሚለው ሃሳብና መረዳት ከክርስቶስ ልደት በኋላ ከ325 ዓመታት በኋላ በቲዎሎጂያኖች የመጣ ጽንሰ ሃሳብ እና concept ነው እንጂ ከዚያ በፊት የሚታወቅ የመጽሐፍ ቅዱስ አስተምሮት አይደለም። ስለዚህም ነው የስላሴ ትምህርት የእግዚአብሔርን ማንነት ጥያቄ ከሚመልስ ይልቅ ይባስ ብዙ ጥያቄዎችን ለአይሁድና ለእስላሞች ብቻ ሳይሆን ለክርስቲያኖችም የሚፈጥረው።

ብዙም የስላሴ አማኞችም ጭምር ለመረዳት የሚከብቻቸው ጽንሰ ሐሳብ ስለሆነ ነው፤ ሁልጊዜ ይህ ጥያቄ ሲነሳ፤ ኦ ከባድ ነው፣ በመገለጥ ነው፣ አይገባም፣ ምስጢራዊ ነው፣ ለመረዳት አይቻልም ወደሚል ሽሽት የሚገቡት። በመጽሐፍ ቅዱስ የሌለ የቲዎሎጂያኖች ጽንሰ ሃሳብ ስለሆነም እንዲሁ በቀላሉ ለመረዳት የሚከብድ ምስጢራዊ አስተሳሰብ የሆነው።

እንዲህም ሆኖ ግን፤ ብዙ ክርስቲያኖች ያልተረዱትን ይህንን ጽንሰ ሃሳብ ካለመኑ የሚድኑ አይመስላቸውም። መረዳት አይቻልም፣ ምስጢራዊ ነው ይላሉ በአንድ በኩል፤ ነገር ግን ይሄንን ከ325 ዓመታት ከክርስቶስ ልደት በኋላ የመጣ ትምህርትን ካላመንክ ደግሞ በቃ አልዳንክም ይላሉ። የትም ቦታ መጽሐፍ ቅዱስ ውስጥ የስላሴን ትምህርት ጽንሰ ሃሳብ ማለትም እግዚአብሔር በሶስት እኩል በሆኑ ስብዕና ይገለጣል ብለህ ካላመንክ አትድንም የሚባል ነገር የለም።

ቲዎሎጂያኖች ነገሩን አወሳሰቡትና ምስጢራዊ አደረጉት እንጂ፤ ብሉይም ይሁን አዲስ ኪዳን አንዱ እግዚአብሔር፤ የእስራኤል አምላክ የሆነው የኢየሱስ ክርስቶስ አባት አብ እንደሆነ በግልጽ አስቀምጦታል በቃ! ምንም ምስጢራዊ ምናም ነገር የለውም።

ጌታ ይባርካችሁ!
እየሱስ አያማልድም ወይ?
0 ድምጾች
ሰላም ይብዛላችሁ። ከሁሉ አስቀድሜ የምገልፀው ነገር ቢኖር ከጥንት እስራኤል እንዲህ ተብለው ነበር። "አምላካችሁ እግዚሃብሔር አንድ እግዚአብሔር ነው "። ይህ ማለት አምላካችንን ብንቆጥር አንድ እግዚአብሔር ወይም አንድ አምላክ ብቻ ሆኖ እናገኝዋለን። ይህ አምላክ መንፈስ ነው። ይህ አምልክ ቅዱስ ነው። ይህ አምላክ አልፋና ኦሜጋ ነው። ይህም ማለት ከ እርሱ በፊት ማንም አልነበረም፥ እርሱንም አሳልፎ የሚመጣ ማንም የለም። ይህ አምላክ በሰማይ ዙፋኑ ላይ ይኖራል። ይህ አምላክ በመንፈሱ ሰማይንና ምድርን ሞልቷል። ይህ አምላክ እራሱ በስጋ ተገልጧል። ስለዚህ ጌታ እንዲህ ኣለ። አብ በእኔ እንዳለ እኔም በአብ እንዳለሁ. . . ልክ አንዲሁ መንፈስ ቅዱስም የ እግዚአብሔር መንፈስ እንደተባለ ሁሉ የኢየሱስ መንፈስም ተብሏል። ሁሉ የእግዚአብሔር ማንነቱና መገለጫው ነው ብዬ እረዳለሁም አምናለሁም። አባትም፥ ልጅም፥ መንፈስ ቅዱስም የሆነው ኤርሱ አንዱ እግዚአብሔር እንጂ ሌላ የለምና። ሁሉ ከእርሱ በእርሱ ለእርሱ ሆነ። አሜን።
4 ዓመታት በፊት ስም-አልባ የተመለሰ

የተዛመዱ ጥያቄዎች

1 መልስ
3 ዓመታት በፊት መንፈሳዊ ስም-አልባ የተጠየቀ
2 መልሶች
2 ዓመታት በፊት መንፈሳዊ ስም-አልባ የተጠየቀ
3 መልሶች
3 ዓመታት በፊት መንፈሳዊ ስም-አልባ የተጠየቀ
2 መልሶች
3 መልሶች
5 ዓመታት በፊት መንፈሳዊ ስም-አልባ የተጠየቀ
የኒውስ ሌተር ምዝገባ
የእርስዎ ስም ኢሜል አድራሻዎ ኢሜል አድራሻዎ (በድጋሚ)
»የመጽሐፍ ቅዱስ ቃላት መፈለጊያ   የመጽሐፍ ቅዱስ ቃላት መፈለጊያ
Copyright © 2004-2017 by iyesus.com
Terms of use | Contact us